Ceyhun Məmmədov,
Milli Məclisin deputatı
Bu gün Azərbaycan xalqı Prezident İlham Əliyevi dəstəkləyir, ona yüksək etimad göstərir. Heç şübhəsiz ki, bu sevginin və dəstəyin arxasında onun həyata keçirdiyi uğurlu daxili və xarici siyasət durur. Müasir dövrdə Azərbaycan xalqı bu siyasət nəticəsində Vətən müharibəsi imtahanından üzüağ çıxmağı bacardı.
Hazırda qarşıda duran ən vacib məsələlərdən biri xalqımızın birlik və həmrəyliyini qorumaqdır. Azərbaycan xalqı inkişaf və tərəqqiyə yalnız bu yolla nail ola bilər. Bu gün düşməni ən çox narahat edən və qorxudan məsələlərdən biri məhz xalqımızın müdrikcəsinə nümayiş etdirdiyi birlik və həmrəylikdir.
Vətən müharibəsində qələbədən sonra Prezident İlham Əliyevin tapşırıq və tövsiyələrinə əsasən şəhid və qazi ailələri dövlətin yüksək diqqət və qayğısı ilə əhatə olunublar. Bu gün ölkəmizdə bu kateqoriyadan olan insanların maddi durumunun yaxşılaşdırılması, ev və avtomobillə təmin olunması istiqamətində ciddi işlər həyata keçirilir. Hazırda Prezident İlham Əliyevin özü bütün bu işləri xüsusi diqqətdə və nəzarətdə saxlayır.
Eyni zamanda, bu gün işğaldan azad olunan ərazilərdə yüksək abadlıq və quruculuq işləri həyata keçirilir. Qısa müddətdə Füzulidə beynəlxalq hava limanının inşa olunması, Zəngilanda "Ağıllı kənd" layihələrinin uğurla icra olunması, Zəfər yolunun inşası, Beynəlxalq əhəmiyyətli Zəngəzur dəhlizinin təməlinin qoyulması, işğaldan azad olunmuş rayonların baş planlarının hazırlanması, həmin ərazilərdə dəmir yollarının və avtomobil yollarının sürətli çəkilişi, su elektrik stansiyalarının bərpası və digər mühüm layihələrin icrası Prezident İlham Əliyevin gərgin və fədakar əməyinin nəticəsidir.
Qarşıda isə hələ bir çox mühüm vəzifələr durur. Heç şübhəsiz ki, Prezident İlham Əliyevin rəhbərliyi ilə Azərbaycan xalqı bütün taleyüklü məsələlərin öhdəsindən uğurla və ləyaqətlə gəlməyi bacaracaq. Bu işdə hər birimizin üzərinə böyük vəzifələr düşür. Öz nümunəvi fəaliyyətimizlə Prezidenti dəstəkləməli, hər zaman onun yanında olmalıyıq. Azərbaycanda xalq-iqtidar birliyi dönməz və sarsılmazdır.
