Birləşmiş Ərəb Əmirliyinin(BƏƏ) hakim ailəsinin ən nüfuzlu üzvlərindən biri olan Şeyx Tahnun bin Zayed Əl Nəhyan regional diplomatiyanın diqqət mərkəzinə çevrilib.
Modern.az “Bloomberg”ə istinadən məlumat verir ki, ABŞ və İran arasında gərginliyin artdığı bir dövrdə məhz Şeyx Tahnun Birləşmiş Ərəb Əmirlikləri ilə Tehran arasında əlaqə kanallarının bərpasında mühüm rol oynayıb.
Trilyon dollardan artıq həcmdə aktivləri idarə edən maliyyə və investisiya strukturlarına nəzarət edən Şeyx Tahnun son illərdə regionun ən təsirli siyasi və iqtisadi fiqurlarından biri kimi önə çıxır.
Bildirilir ki, İranın hücumları nəticəsində BƏƏ-yə milyardlarla dollar ziyan dəysə də, Əbu-Dabi rəhbərliyi zamanla daha praqmatik siyasət yürütməyə başlayıb. Bu yanaşmanın əsas məqsədi ölkənin iqtisadi maraqlarını, xarici investisiyaları və BƏƏ-nin qlobal maliyyə və texnologiya mərkəzi statusunu qorumaqdır.
"Bloomberg" qeyd edir ki, Şeyx Tahnun hazırda İranla bağlı regional danışıqlarda əsas vasitəçilərdən biri kimi çıxış edir və onun diplomatik fəaliyyəti Yaxın Şərqdə qüvvələr balansına təsir göstərə biləcək amillərdən hesab olunur.
Qeyd edək ki, Şeyx Tahnun 1971-ci ildə Əbu-Dabidə anadan olub. O, BƏƏ-nin yaranma dövrünə təsadüf edən bir mərhələdə dünyaya gəlib və erkən yaşlardan etibarən dövlət idarəçiliyi və təhlükəsizlik sahəsinə yönəlib. Şeyx Tahnunun ilkin təhsilini BƏƏ-də aldığı, daha sonra isə Böyük Britaniyada hərbi və strateji idarəetmə sahəsində hazırlıq keçdiyi bildirilir. Təhlükəsizlik, dövlət idarəçiliyi və strateji planlama sahələrində formalaşan bu təhsil onun sonrakı fəaliyyətinə ciddi təsir göstərib. Şeyx Tahnun uzun illər BƏƏ-nin milli təhlükəsizlik və kəşfiyyat sistemində yüksək vəzifələrdə çalışıb. O, ölkənin daxili və xarici təhlükəsizlik siyasətinin formalaşmasında iştirak edən əsas fiqurlardan biri kimi qiymətləndirilir.
Onun fəaliyyəti xüsusilə strateji təhlükəsizlik məsələlərində, regionda baş verən siyasi proseslərin idarə olunmasında və risklərin qiymətləndirilməsində özünü göstərir. Şeyx Tahnun təkcə təhlükəsizlik sahəsində deyil, həm də BƏƏ-nin nəhəng investisiya strukturları ilə sıx bağlıdır. O, trilyon dollarlıq aktivlərin idarə olunduğu suveren fondlar və maliyyə şəbəkələrinə təsir edən əsas şəxslərdən biridir.
Onun nəzarət etdiyi və ya təsir göstərdiyi investisiya mexanizmləri qlobal enerji, texnologiya və strateji layihələrdə mühüm rol oynayır. Bu səbəbdən o, yalnız regional deyil, qlobal iqtisadi proseslərdə də təsir gücünə malik fiqur kimi qəbul edilir.
