Venesuelada baş verən güclü zəlzələlər nəticəsində həyatını itirənlərin sayı sürətlə yüksəlməkdədir. Davam edən afterşoklar isə axtarış-xilasetmə əməliyyatlarını xeyli çətinləşdirir.
Modern.az-ın məlumatına görə, bu barədə CNN News Bolivar Respublikası Milli Assambleyasının sədri Xorxe Rodriqesə istinadən xəbər yayıb.
Rodriqes bildirib ki, həftə ərzində ölkədə baş vermiş iki dağıdıcı zəlzələ nəticəsində indiyədək azı 1 430 nəfər ölüb, 3 238 nəfər isə müxtəlif dərəcəli xəsarətlər alıb. Onun sözlərinə görə, xilasedicilər dağıntılar altında sağ qalanları tapmaq üçün fasiləsiz çalışsalar da, ağır texnikanın azlığı və ardıcıl afterşoklar əməliyyatları ləngidir.
Məlumata əsasən, təbii fəlakət nəticəsində 3 142 ailə yaşayış yerini itirib və onlar müvəqqəti sığınacaqlarda yerləşdirilib.
Telekanal qeyd edir ki, uzun illər ərzində səhiyyə sisteminə yetərincə investisiya qoyulmaması səbəbindən Venesuela xəstəxanaları çoxsaylı yaralıların müalicəsində ciddi çətinliklərlə üzləşib.
Eyni zamanda bildirilib ki, ABŞ zəlzələnin nəticələrinin aradan qaldırılmasına dəstək məqsədilə bölgəyə axtarış-xilasetmə qrupları göndərib.
Məlumatda deyilir ki, hər biri 80 nəfərdən ibarət iki peşəkar xilasedici qrup artıq Venesuelaya yola düşüb. Bu qruplar ABŞ Dövlət Departamentinin koordinasiyası ilə həyata keçirilən humanitar əməliyyatlarda iştirak edəcəklər.
Qeyd edək ki, iyunun 25-nə keçən gecə Venesuelanın şimal hissəsində 7,1 maqnitudalı zəlzələ qeydə alınıb. Daha sonra ABŞ Geologiya Xidməti 40 saniyə fasilə ilə 7,2 və 7,5 maqnitudalı daha iki güclü yeraltı təkanın baş verdiyini açıqlayıb. Hadisədən sonra ölkədə fövqəladə vəziyyət elan olunub.
