Azərbaycan toyları mədəniyyətin ayrılmaz hissəsi olmaqla yanaşı, milli incəsənətin təbliği üçün də mühüm platforma hesab olunur.
Modern.az xəbər verir ki, bunu mədəniyyət naziri Adil Kərimli “Real TV”yə müsahibəsində bildirib.
Nazir qeyd edib ki, toy mədəniyyəti Azərbaycan mədəniyyətinə rəqib deyil, əksinə onun zəngin tərkib hissəsidir:
“Azərbaycan toy adətləri dünya səviyyəsində araşdırılan və təhlil olunan bir sistem kimi qəbul edilir”.
Onun sözlərinə görə, toylar bu gün əsl sənətin yaşadılması və təbliği üçün mühüm imkan yaradır:
“Toylarımızı incəsənətimizi yaşadan bir platforma kimi qiymətləndirməliyik”.
Adil Kərimli vurğulayıb ki, əsas məsələ peşəkar və qeyri-peşəkar sənətin düzgün fərqləndirilməsi və cəmiyyətə doğru təqdim olunmasıdır:
“İnsanlar peşəkar sənətlə qeyri-peşəkar sənəti ayırd etməyi bacarmalıdır”.
Nazir bildirib ki, klassik musiqi və Azərbaycan folklorunun toy məclislərində daha geniş təbliği vacib yanaşma ola bilər:
“Toyları insanların zövqünün formalaşdırılması və milli sənətin təbliği üçün platformaya çevirmək mümkündür”.
O əlavə edib ki, cəmiyyətdə fərqli zövqlərin olması təbiidir:
“Mono zövq formalaşdırmaq mümkün deyil. Cəmiyyətin rəngarəngliyi onun gözəlliyidir”.
