Modern.az

Masaçusets Universitetinin azərbaycanlı professoru

Masaçusets Universitetinin azərbaycanlı professoru

10 Fevral 2019, 13:30

O, uzun illər Azərbaycan Tibb İnstitutunun biokimya kafedrasının müdiri işləmiş, sonradan Azərbaycan Dövlət Bədən Tərbiyəsi və İdman Akademiyasında biokimya kafedrasına rəhbərlik etmiş, 29 yaşından tibb elmləri doktoru olmuş, mərhum professor Akif Məmmədovun yadigarıdır. Babası Əliş Məmmədov Şuşa Realnı Məktəbini bitirərək, uzun illər Bakıdakı orta məktəblərdə müəllimlik edib. 

Anası Rəna Əliyeva tibb elmləri namizədi idi. Ömrünün son illərini AMEA-nın Mikro Biologiya İnstitunda baş elmi işçi vəzifəsində çalışıb. Rəna xanımın atası İsgəndər Əliyev ötən əsrin 30-cu illərində yüngül sənaye naziri vəzifəsində işləyib, anası Pəri Həsənzadə isə "Şərq Qadını" jurnalının məsul katibi olub…

Haqqında söhbət açdığım Nazim Məmmədov 1958-ci ildə Bakı şəhərində dünyaya gəlib. 1975-ci ildə 6 nömrəli orta məktəbi bitirib. 1976-1981-ci illərdə Azərbaycan Dövlət Universitetinin Biologiya fakültəsində ali təhsilə yiyələnib. 1981-1984-cü illərdə Təbiəti Mühafizə Komitəsinin hidrobiologiya laboratoriyasında işləyib. 1984-1988-ci illərdə AMEA-nin Nəbatət İnstitutunun aspirantı olub. 1988-ci ildə Moskva Dövlət Universitetində elmi işini müdafiə edərək biologiya elmləri namizədi alimlik dərəcəsinə layiq görülüb. 

1988-1994-cü illərdə Nəbatət İnstitutunda elmi işçi, baş elmi işçi vəzifələrində çalışıb. Bir il doktoranturada oxusa da, elmi tədqiqatlarını yarımçıq qoymaq məcburiyyətində qalıb. Londonda keçirilən "Kral Botanika Bağları"nın təşkil etdiyi konqressə dəvət alıb. Həmin tədbirdə bir neçə dəfə dərman bitkiləri haqqında məruzəylə çıxış edib. 1994-cü ildə ABŞ-ın Masaçusets ştatının Amherst şəhərinə gəlib. O vaxtdan Masaçusets Universitetinin Kənd təsərrüfatı fakültəsinin nəzdində olan dərman bitkiləri laboratoriyasında çalışır. Ötən müddət ərzində post doktor vəzifəsindən professor vəzifəsinədək yüksələ bilib. 2005-ci ildən həmin laboratoriyada tələbələrə dərs də deyir…


…Ömür-gün yoldaşı Səidə Səfiyeva da 1983-cü ildə BDU-nun Biologiya fakültəsini bitirib. Amerikaya gələndən bir müddət sonra təhsili davam etdirərək 1999-cu ildə Masaçusets Universitetində magistr dərəcəsinə yiyələnib. Hazırda həmin universitetin laboratoriyasında kimyaçı işləyir.

Dilbər adlı bir qızları var. Dilbər xanım valideynləri çalışdığı universitetdə ictimai səhiyyənin təşkili üzrə ali təhsil alaraq, oranı fərqlənmə diplomu ilə bitirib. Hazırda Kolumbia Universitetində öz ixtisası üzrə magistr təhsili alır. Azərbaycan dilində sərbəst danışa bilir...

Professor Nazim Məmmədov çox azad düşüncəli, təvəzökar, geniş dünya görüşlü, insanpərvər, uzaq görən soydaşlarımızdandır. Yaşadığı şəhərə təhsil almağa gələn tələbələrə çox əl tutub, onların məişət problemlərinin həllində yaxından iştirak edib…

Deyir ki, "Elmin dili ingilis dilidir. Qoy gənclərimiz bu dilə mükəmməl yiyələnsinlər. Dəqiq elmləri mənimsəməyə cəhd etsinlər. ABŞ-da dəqiq elmlərə yiyələnən gənclərə böyük üstünlük verilir. Mən istəyirəm ki, ABŞ-a ölkəmizdən çoxlu gənc gəlsin, buranın dünya səviyyəli universitetlərində təhsil alsınlar. Demirəm ki, qısa müddətdə elmdə Yapon xalqının səviyyəsinə yüksələk, amma bizim də o zirvənin yaxınlığında yerimiz olsun"…
Mütaliəni çox sevir, elmi, tarixi əsərləri oxumaqdan zövq alır. Arzulayır ki, xalqımız firavan yaşasın, Qarabağ tezliklə geri alınsın. Azərbaycanda təhsillə əlaqədar problemlər aradan götürülsün. Bu arzular hamımıza doğmadır, hamımızın diləyidir. Uzaq Amerikada bizi düşünən, Azərbaycanın inkişafına sevinən professora möhkəm can sağlığı arzulayırıq…



Elman Eldaroğlu,
ABŞ, Miçiqan

 

Telegram
Hadisələri anında izləyin!
Keçid et
Ukraynadan Rusiyaya ardıcıl zərbələr: Vəziyyət kritikdir