Facebook sosial şəbəkəsi Yahoo şirkətinə qarşı qarşılıqlı iddia qaldıraraq əvvəllər patent hüququnun pozulması ilə bağlı səsləndirilən iddialara cavab verib. Modern.az-ın Cybersecurity-yə istinadən verdiyi məlumata görə, iddiada Facebook Yahoo-nu sosial şəbəkəyə məxsus bir sıra patentlərin pozulmasında ittiham edib. Sosial şəbəkə nümayəndələrinin fikrincə, Yahoo-nun əsas səhifəsi və orada yerləşdirilən reklam, xəbərləri istifadəçilərin maraqlarına uyğun seçən C.O.R.E. texnologiyası, eləcə də şirkətə məxsus populyar Flickr fotohostinqi Facebook-un patent hüquqlarını pozur.
İki şirkət arasında patent mübarizəsi 2012-ci il fevralın sonunda - Yahoo Facebook-u özünün 10 patentinin pozulmasında ittiham etdikdən sonra başlayıb. İki həftə sonra şirkət sosial şəbəkəni məhkəməyə verib. İddialarda internet-reklamın göstərilməsi, mətnli məlumatların ötürülməsi, sosial şəbəkələrdə şərhlərin edilməsi texnologiyası yer alıb. Facebook bu ittihamları rədd edir.