Modern.az

Dağlıq Qarabağın azərbaycanlı icması qondarma "seçkilərlə" bağlı BƏYANAT YAYDI

Dağlıq Qarabağın azərbaycanlı icması qondarma

Qarabağ

1 Aprel 2020, 09:50

Azərbaycan Respublikasının Dağlıq Qarabağ bölgəsinin azərbaycanlı icmasının rəhbəri Tural Gəncəliyevin ölkəmizin işğal olunmuş ərazilərində keçirilən qanunsuz “seçkilər”ə dair bəyanat yayıb.

 

Modern.az xəbər verir ki, bəyanatda deyilir:

                                                    

Sual: Azərbaycanın işğal olunmuş ərazilərində keçirilən qanunsuz “seçkilər”ə dair Azərbaycanın Dağlıq Qarabağ bölgəsinin azərbaycanlı icmasının mövqeyi necədir?                                                      

 

Cavab: Azərbaycan Respublikasının işğal edilmiş Dağlıq Qarabağ bölgəsində 2020-ci ilin 31 mart tarixində “prezident və parlament seçkiləri” adı altında növbəti “seçki şousu” təşkil edilib. Təcavüzkar Ermənistan və onun əlaltısı olan işğalçı rejimin bu addımı qanunsuzdur, heç bir hüquqi əsası yoxdur, demokratiya və seçki adına böyük bir ləkədir.   

 

Sual: Bütün bəşəriyyətin üzləşdiyi pandemiya təhlükəsinə baxmayaraq, bu qanunsuz “seçkilərin” keçirilməsi hansı məqsədə xidmət edir?  

 

Cavab: Dünyanın hazırda koronavirus (COVID-19) pandemiyası ilə üzləşdiyi vaxtda, insanların həyatının təhlükə altında qalmasına baxmayaraq, Ermənistan və işğalçı rejim öz xislətinə sadiq qalaraq hətta belə bir vəziyyətdə qanunsuz fəaliyyətini davam etdirir və “seçkilər” adlı şou keçirir. Bu bir daha Ermənistan və qondarma qurumun söykəndiyi “dəyərlərin” və əsarətində saxladığı Azərbaycan Respublikasının Dağlıq Qarabağ bölgəsinin erməni icmasının üzvlərinə olan “münasibətinin” göstəricisidir, həmin insanların həyatı və taleyinin rejim üçün nə qədər önəmsiz olduğunu təsdiq edir. Hesab edirəm ki, Dağlıq Qarabağda yaşayan ermənilər onlara dəyər verməyən, pandemiya təhlükəsindən qorumaq əvəzinə onları saxta oyunların qurbanına çevirən Ermənistanın və işğalçı rejimin əlində alət olduqlarını nəhayət ki anlayacaqlar.

 

Erməni diasporunun təsiri altında olan bəzi adamlar belə saxta “seçkiləri” müşahidə etmək məqsədilə əvvəllər işğal olunmuş ərazilərimizə gedirdilər, ancaq, sonuncu “seçkilərə” həmin şəxslər getməyərək, maraq göstərməmişlər.   


İşğal olunmuş Dağlıq Qarabağda qanunsuz “seçki” keçirilməsi etnik təmizləməyə məruz qalmış və torpaqlarından qovulmuş azərbaycanlıların əsas insan hüquqlarının kobud şəkildə tapdalanmasıdır. Bildirirəm ki, belə saxta “seçki”lərlə bağlı əvvəllər BMT, ATƏT, digər beynəlxalq təşkilatlar və beynəlxalq ictimaiyyət dəfələrlə bəyanatlar verərək, Azərbaycanın işğal olunmuş ərazilərindəki qanunsuz “seçkiləri” pisləmiş və Azərbaycanın beynəlxalq səviyyədə tanınmış sərhədlərinin toxunulmazlığını bəyan etmişlər. Dünənki tarixdən etibarən beynəlxalq təşkilatlar və dövlətlərin verdiyi bəyanatlar bir daha göstərir ki, bu “seçki”ləri heç kim tanımır və qanunsuz hesab edir.   

 

Bu qanunsuz seçkilər danışıqlar prosesinə daha bir zərbədir və vəziyyətin gərginləşməsinə xidmət edir.    

 

Əminəm ki, Dağlıq Qarabağda yaşayan ermənilər Azərbaycan Respublikasının beynəlxalq səviyyədə tanınmış sərhədləri bərpa olunduqdan sonra geriyə dönəcək azərbaycanlılarla birlikdə ölkəmizin Konstitusiyası və digər qanunlarına uyğun olaraq keçiriləcək qanuni seçkilərdə iştirak edəcəklər.

Twitter
Sizə yeni tvit var
Keçid et
Ukraynadan Rusiyaya ardıcıl zərbələr: Vəziyyət kritikdir