Bir müddət öncə - mayın 14-də ekologiya və təbii sərvətlər nazirinin birinci müavini vəzifəsinə təyin edilmiş Ağakərim Səmədzadənin tərcümey-halı açıqlanıb.
Modern.az xəbər verir ki, Ekologiya və Təbii Sərvətlər Nazirlyinin məlumatına görə, nazirin yeni birinci müavini Ağakərim Ağasəməd oğlu Səmədzadə 16 aprel 1979-cu ildə Bakı şəhərində anadan olub.
Müxtəlif illərdə Bakı Dövlət Universitetində filologiya və hüquqşünaslıq, həmçinin Azərbaycan Respublikasının Prezidenti yanında Dövlət İdarəçilik Akademiyasında menecment ixtisasları üzrə ali təhsil alıb.
2015–2018-ci illərdə Rusiya Federasiyası Prezidenti yanında Xalq Təsərrüfatı və Dövlət Qulluğu Akademiyasında Hüquq fakültəsinin magistratura pilləsində oxuyub.
Əmək fəaliyyətinə 1997-ci ildə “Azəravtoyol” Dövlət Şirkətində hüquq məsləhətçisi kimi başlayıb, 1999–2002-ci illərdə Sosial-İqtisadi Araşdırmalar Mərkəzində fəaliyyətini davam etdirib.
2002–2024-cü illərdə Ədliyyə Nazirliyində çalışıb, həmin dövrün 17 ilini rəhbər vəzifələrdə fəaliyyət göstərib.
2024–2026-cı illərdə Azərbaycan İnvestisiya Şirkətində və Azərbaycan Biznesinin İnkişafı Fondunda İdarə Heyəti sədrinin müşaviri və baş direktor vəzifələrində işləyib.
Ölkə Prezidentinin 2026-cı il 13 may tarixli Sərəncamı ilə ekologiya və təbii sərvətlər nazirinin birinci müavini təyin edilib.
