Ադրբեջանը ցանկանում է խաղաղություն կնքել ոչ միայն Հայաստանի կառավարության, այլև հայ ժողովրդի հետ։
Modern.az-ը հայտնում է, որ այս մասին Բաքվում կայացած CAMCA 2026 տարածաշրջանային ֆորումի ժամանակ հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերի բաժնի վարիչ Հիքմեթ Հաջիևը։
Հիքմեթ Հաջիևը նշել է, որ ներկայումս տարածաշրջանում առկա է փաստացի խաղաղություն և անվտանգություն, և դրա պահպանումը կարևոր է Հարավային Կովկասը ավելի լայն տարածաշրջանային գործընթացների բացասական ազդեցություններից պաշտպանելու տեսանկյունից. «Լավ նորությունն այն է, որ Կովկասում կա խաղաղություն և անվտանգություն։ Եթե Կովկասում անվտանգությունն ու խաղաղությունը չապահովվեին, հավանաբար մեր տարածաշրջանում բոլորովին այլ իրավիճակների և իրողությունների կբախվեինք»։
Նրա խոսքով, Ադրբեջանը առաջնահերթ է համարում խաղաղության հասնելը և դրա ամրապնդումը գործնական հարթությունում՝ Հայաստանի հետ երկար տարիներ տևած հակամարտության լուծումից հետո. «Մենք միշտ ասել ենք, որ հաղթել ենք պատերազմում, բայց ավելի կարևոր էր հաղթել նաև խաղաղությունը։ Սա իսկապես մեծ ջանքեր պահանջող գործընթաց է։ Դրա համար անհրաժեշտ էր ռազմավարական մտածողություն, համբերություն և նախագահ Իլհամ Ալիևի ղեկավարությունը»։
Հիքմեթ Հաջիևը նշել է, որ Ադրբեջանը չի ցանկանում այս խաղաղությունը կնքել միայն Փաշինյանի կառավարության, վարչապետ Փաշինյանի հետ. «Մենք ցանկանում ենք այս խաղաղությունը կնքել հայ ժողովրդի հետ։ Ադրբեջանի նպատակն է կանխել ապագա սերունդների տառապանքը հակամարտության հետևանքներից և ստեղծել մեխանիզմներ, որոնք կարող են խաղաղության օրակարգը վերածել երկարաժամկետ տարածաշրջանային կայունության»։
