Eron Islom inqilobi posbonlari korpusi AQSHga tegishli “MQ-1” turidagi uchuvchisiz uchoq urib tushirilganini maʼlum qildi.
Modern.az xabar berishicha, Eron tomonining maʼlumotlariga koʻra, mamlakatning havo hujumidan mudofaa tizimlari uchuvchisiz uchoqni Hormuz boʻgʻozi ustida yoʻq qilgan.
Voqea tafsilotlari, uchuvchisiz apparatning parvoz marshruti va qaysi havo hududida urib tushirilgani haqida qoʻshimcha maʼlumot berilmagan. AQSH tomonining ushbu aniq daʼvoga munosabati ham xabar tarqalgan vaqtda eʼlon qilinmagan edi.
Taʼkidlash joizki, Hormuz boʻgʻozi dunyo neft va suyultirilgan tabiiy gaz tashishlarining asosiy marshrutlaridan biridir. Mintaqadagi harbiy hodisalar xalqaro yuk tashish va energiya bozorlari uchun jiddiy xavf hisoblanadi.
