Rossiya Armaniston hukumati siyosiy talablarini bajarmasa, 1-noyabrdan Armanistonga gaz yetkazib berishni toʻxtatishi mumkin.
Modern.az xabar berishicha, bu haqda “Hraparak” gazetasi Rossiya manbalariga tayanib maʼlumot tarqatdi.
Gazetaning yozishicha, Moskvaning Yerevandan bir qator talablari bor. Bularga Rossiyaning 102-harbiy bazasi bilan bogʻliq masalani muhokama qilishdan va Rossiya kapitali ishtirokida faoliyat yurituvchi kompaniyalarga qarshi choralardan voz kechish kiradi.
Shuningdek, Rossiya Armanistonning Yevropa Ittifoqiga aʼzo boʻlish jarayonini boshlash toʻgʻrisidagi qonunni bekor qilishni yoki referendum oʻtkazish sanasini eʼlon qilishni talab qilayotgani aytiladi.
Maʼlumotlarga koʻra, Moskvaning yana bir talabi Rossiyaparast hisoblangan siyosatchilarni taʼqib qilishni toʻxtatishdir. Gazeta, shuningdek, Rossiya uchun maqbul boʻlgan shaxsni bosh vazir oʻrinbosari lavozimiga tayinlash ham talab qilinayotganini yozgan.
Qayd etish joizki, bu maʼlumot “Hraparak” gazetasining Rossiya manbalariga tayanib tarqatgan daʼvolariga asoslanadi.
