Keniyada təhsil sistemi ana dilində tədrisin üstünlükləri ilə ingilis dilinin ali təhsil və əmək bazarındakı əhəmiyyətini uzlaşdırmağa çalışır.
Modern.az xəbər verir ki, bu barədə Al Jazeera məlumat yayıb.
Məlumata görə, şagirdlər və məzunlar ana dilində təhsilin dərs materialını daha yaxşı mənimsəməyə kömək etdiyini bildirsələr də, ingilis dilinin ali təhsil və peşəkar karyera üçün əsas vasitə olaraq qaldığını vurğulayırlar.
Keniyanın Keriço bölgəsində yaşayan 33 yaşlı beş uşaq anası Lona Çepkemoi 2023-cü ildə texniki kollecə qəbul olarkən dərslərin qismən ana dilində keçirildiyini gördüyünü deyib. Onun sözlərinə görə, ibtidai məktəbdə bütün dərslərin və imtahanların yalnız ingilis dilində olması səbəbindən mövzuları mənimsəməkdə çətinlik çəkib.
Hazırda ölkənin təhsil siyasətinə əsasən, ibtidai məktəbin ilk illərində tədris ana dilində aparılır. Dördüncü sinifdən etibarən isə əsas tədris dili ingilis dili olur, bununla yanaşı, suahili dilindən də geniş istifadə edilir. Bununla belə, bu siyasətin tətbiqi regiondan, müəllimlərin hazırlıq səviyyəsindən və şagirdlərin dil mühitindən asılı olaraq fərqlənir.
UNESCO-nun Qlobal Təhsil Monitorinqi hesabatına əsasən, dünyada şagirdlərin təxminən 40 faizi yaxşı bildiyi dildə təhsil almır. Aşağı və orta gəlirli bəzi ölkələrdə isə bu göstərici 90 faizə qədər yüksəlir. Təşkilat hesab edir ki, uşaqlar ən yaxşı başa düşdükləri dildə öyrənirlər və ana dilinə əsaslanan çoxdilli təhsil həm savadlılığın, həm də təhsilin keyfiyyətinin yüksəldilməsində mühüm rol oynayır.
Bununla yanaşı, Keniyada ingilis dili ali təhsil almaq, rəsmi məşğulluq imkanlarını artırmaq və beynəlxalq əmək bazarında rəqabət qabiliyyətini yüksəltmək üçün əsas dil hesab olunur.
