ABŞ Prezidenti Donald Trump haqqında yazılmış “Regime Change: Inside the Imperial Presidency of Donald Trump” (“Rejim dəyişikliyi: Donald Trampın imperiya tipli prezidentliyinin iç üzü”) adlı yeni kitab satışa çıxdıqdan sonra ilk həftədə 300 mindən çox nüsxə satılıb.
Modern.az xəbər verir ki, bu barədə “Associated Press” agentliyi “Simon & Schuster” nəşriyyatının məlumatına istinadən məlumat yayıb.
Nəşriyyatın məlumatına görə, bu rəqəmə əvvəlcədən verilmiş sifarişlər, çap və elektron kitabların satışı, audiokitablar, eləcə də yüksək tələbat səbəbindən hələ yerinə yetirilməmiş sifarişlər daxildir. Kitab artıq üçüncü dəfə əlavə tirajla çap olunur — ilk tiraj kitab mağazalarında və Amazon-da qısa müddətdə satıldıqdan sonra əlavə 200 min nüsxə sifariş edilib.
Nəşriyyat bildirir ki, bu, 2026-cı ildə nəşr olunmuş bütün sərt üzlü qeyri-bədii kitablar arasında ilk həftə satışları üzrə ən yüksək göstəricidir.
Kitabın müəllifləri Meggi Haberman və Conatan Suondur. Hər iki jurnalist “The New York Times” nəşrində çalışır. Kitabda Donald Trampın ikinci prezidentlik müddətinin ilk 14 ayından bəhs edilir. Müəlliflər Ağ Evin Qərb qanadında, prezident iqamətgahında, Mar-a-Lago malikanəsində, prezident təyyarəsində və dövlət başçısının xarici səfərləri zamanı baş verən hadisələri təsvir edirlər.
Donald Tramp isə kitabı kəskin tənqid edərək onun “əksər hissəsinin uydurma” olduğunu bildirib.
Müəlliflər kitabda hərbi qərarların qəbul edilməsi prosesini, Ədliyyə Nazirliyindən siyasi rəqiblərə qarşı istifadə olunmasını, Trampın nüfuzlu siyasi fiqurlarla apardığı danışıqları, həmçinin onun Ağ Evin xarici görünüşünün və daxili quruluşunun dəyişdirilməsinə göstərdiyi diqqəti ətraflı təsvir edirlər.
Kitabın əsas ideyalarından biri ondan ibarətdir ki, Trampın öz fikrincə, əgər o, 2020-ci il seçkilərində məğlub olmasaydı, ikinci prezidentlik dövründə bu qədər geniş siyasi imkanlara malik olmayacaqdı.
Müəlliflərin qənaətinə görə, məhz bu amil ona daha qətiyyətli davranmağa, formalaşmış siyasi normaları yenidən nəzərdən keçirməyə, dövlət institutlarında islahatlar aparmağa və prezident səlahiyyətlərinin sərhədlərini genişləndirməyə imkan verib.
“Simon & Schuster” nəşriyyatında bildiriblər ki, kitab artıq ictimai müzakirələrin mühüm hissəsinə çevrilib və ehtimal ki, Donald Trampın ikinci prezidentlik dövrünü əks etdirən tarixi sənəd kimi əhəmiyyətini qoruyub saxlayacaq.
