Dünya Bankı Çin Xalq Respublikasının kreditləşdirilməsini 2031-ci ilə qədər tamamilə dayandırmağı planlaşdırır.
Modern.az-ın xarici mediaya istinadən verdiyi məlumata görə, son illər ərzində bu beynəlxalq maliyyə institutu tərəfindən Pekinə ayrılan borc vəsaitlərinin həcmində onsuz da kəskin azalma müşahidə olunurdu. Belə ki, Çinə verilən illik kreditlərin həcmi 2017-ci ildəki $2,4 milyarddan 2025-ci ildə $750 milyona qədər geriləyib.
Dünya Bankının bu strateji qərarı Çinin artıq dünyanın ikinci ən böyük iqtisadiyyatına çevrilməsi və yeni qlobal statusu ilə birbaşa bağlıdır.
Maliyyə institutunun əsas donorlarından və idarəedicilərindən olan rəsmi Vaşinqton bu addımı müsbət qarşılayıb. ABŞ rəsmiləri bəyan ediblər ki, Pekin iqtisadi qüdrətinə görə artıq inkişaf etməkdə olan ölkə statusundan çıxıb, buna görə də beynəlxalq institutlardan inkişaf məqsədli maliyyə yardımları və ya güzəştli kreditlər almamalıdır.
Qeyd edək ki, Dünya Bankı analoji qərarı daha əvvəl iqtisadi artım göstəriciləri yüksələn Polşaya qarşı da tətbiq etmişdi. Çinlə bağlı hazırlanmış bu yeni dayandırma planının cari ilin iyul ayında Dünya Bankının Direktorlar Şurası tərəfindən müzakirə edilərək rəsmən təsdiqlənməsi gözlənilir.
