Avropa ilə Asiyanı birləşdirən, Qara dənizi Mərmərə dənizi ilə əlaqələndirən İstanbul boğazı əsrlərdir müxtəlif mədəniyyətlərin və ticarət yollarının qovuşduğu məkan kimi tanınır. Bu günlərdə boğaz ənənəvi “Bosfor kuboku” ("Bosphorus Cup") yelkən yarışına ev sahibliyi edib.
Modern.az xəbər verir ki, 25 illik yubileyini qeyd edən yarışda dünyanın müxtəlif ölkələrindən komandalar və yerli yelkənçilər iki qitə arasında mübarizə aparıblar. Üç gün davam edən yarış zamanı Boğazın sularında rəngarəng yelkənlər şəhərin tarixi panoramasına xüsusi rəng qatıb. Qayıqlar asma körpülərin, Osmanlı saraylarının, tarixi sahil köşklərinin və qədim məhəllələrin qarşısından keçərək İstanbulun bənzərsiz mənzərəsini daha da canlandırıb.
“Bosfor kuboku” 25 il ərzində boğazı həm su üzərindən, həm də sahillərdən fərqli rakurslardan kəşf etmək üçün özünəməxsus imkan yaradıb. Yarışı izləmək üçün xüsusi biletə ehtiyac yoxdur – Boğazın hər iki sahilindən yelkənçilərin mübarizəsinə baxmaq mümkündür.
Lakin boğazın cazibəsi yalnız yarış günləri ilə məhdudlaşmır. Şəhər bərələri ilə iki qitə arasında səyahət etmək, sahil boyunca gəzmək və ya qayıq turlarına qoşulmaq İstanbulun fərqli simasını görməyin ən maraqlı yollarındandır. Kabataş və Eminönü ərazilərindən başlayan turlar zamanı saraylar, qalalar, tarixi köşklər, kafe və restoranlarla əhatələnən sahilləri seyr etmək mümkündür.
Vaxtı daha çox olanlar bərə ilə İstanbulun məşhur adalarına da üz tuta bilərlər. Büyükada, Heybeliada, Kınalıada, Burgazada və Sedef adasına müntəzəm reyslər həyata keçirilir. Yaşıllıqlar, tarixi taxta villalar və sakit sahil məkanları ilə seçilən adalar böyük şəhərin yaxınlığında dincəlmək üçün əlverişli istiqamətlərdir.
Boğazın yaratdığı xüsusi atmosfer İstanbul mətbəxində də özünü göstərir. Sahilboyu məkanlarda ənənəvi türk səhər yeməyi, balıq və məzələrdən tutmuş müasir Anadolu mətbəxinə qədər müxtəlif seçimlər təqdim olunur. Bəzən isə Boğaza açılan mənzərə qarşısında bir fincan türk qəhvəsi kifayət edir.
Sahillər aktiv istirahət üçün də geniş imkanlar yaradır. Piyada və qaçış yolları, velosiped marşrutları ilə yanaşı, küləksörfinqi, dəniz velosipedi və ayaqüstü avarçəkmə (SUP) kimi fəaliyyətlər də mümkündür.
İstər sahilboyu gəzinti, istər bərə səfəri, istərsə də su üzərində aktiv istirahət olsun, İstanbul boğazı şəhərin tarixini, mədəniyyətini və müasir həyatını bir araya gətirən canlı məkandır.
“Bosfor kuboku”un 25 illik tarixçəsi də bunu bir daha nümayiş etdirir: Boğaz sadəcə iki qitəni ayıran su yolu deyil, İstanbulun ruhunu birləşdirən bənzərsiz məkandır.
