"Qlobal mənzil böhranının həlli istiqamətində bu yol xəritəsi ilə irəlilədikcə, hazırda 50 faiz şəhərləşmiş olan dünyamızın cəmi iki onillik ərzində 70 faiz şəhərləşmiş bir planetə çevriləcəyini görürük".
Modern.az xəbər verir ki, bunu Davamlı İnkişaf Həlləri Şəbəkəsinin (SDSN) direktoru CeffriSaks deyib.
O bildirib ki, davamlı İnkişaf Məqsədlərinin 2030-cu il hədəf tarixinə yaxınlaşırıq və paralel olaraq iqlim dəyişikliyi, təbii fəlakətlər, münaqişələr və yenidənqurma proseslərinin yaratdığı artan təzyiqlərlə üz-üzəyik:
"Biz həm quruculuğu davam etdirməli, həm də itkiləri bərpa etməliyik. İnsanlar getdikcə daha çox şəhərlərə köçür, xüsusilə də Afrika kimi bölgələrdə. Burada əsasən gənc əhalidən və onsuz da ciddi çətinliklərlə qarşılaşan şəhərlərdən danışırıq. Bir çox yerlərdə əsas xidmətlər hələ də əlçatmazdır və insanlar fundamental imkanlara çıxış əldə edə bilmirlər".
C.Saks onu da bildirib ki, şəhərlərə ümumi sığınacağımız kimi baxsaq onların qarşılaşdığı problemlərin miqyasını daha yaxşı anlaya bilərik:
"Elə iki gün əvvəl biz bu reallığı burada, Bakıda yaşadıq. Mənə təqdim olunan məlumatlara əsasən, şəhərə bir gün ərzində illik normadan dörd dəfə çox yağış yağıb. Hamımız dayanıqlığın nə qədər vacib olduğunu və planlarımızı yenidən nəzərdən keçirərək uyğunlaşmağın nə qədər təcili olduğunu anladıq.
Məncə, bu, qlobal səviyyədə qarşılaşdığımız problemlərin çox vacib nümunəsidir. Dünyanın müxtəlif şəhərləri daşqınlarla üzləşir, torpaq sürüşmələri və yanğınlardan zərər görür, eyni zamanda təhlükəsizlik problemləri ilə mübarizə aparır. Şəhərlər həqiqətən də ön cəbhədədir.
Bəs gələcəkdə nə baş verəcək? Gələcəyi necə təsəvvür edə bilərik və hansı yeniliklərə ehtiyac olacaq?
Bizə birlikdə düşünə biləcəyimiz, bir araya gəlib fikir mübadiləsi aparacağımız və ortaq şəkildə refleksiya edəcəyimiz məkanlar lazımdır. Şəhərlərin gələcəyini təsəvvür etmək üçün tədqiqatçılar, siyasət formalaşdıran şəxslər və praktik mütəxəssislər, yəni siyasətləri dəyişən və yeni yanaşmalar tətbiq edən insanları bir araya gətirməliyik".
Professor bildirib ki, Bakı da BMT sisteminin bir hissəsi olaraq bu istiqamətdə artıq mühüm töhfələr verib:
"Biz özümüzdən soruşmalıyıq: Necə bir gələcək gözləyirik? Gənclərin arzuları nədir? Qadınların gözləntiləri nədir? Reallıqların fərqli ola biləcəyini anlayaraq müxtəlif ssenarilərə necə hazırlaşa bilərik?
Məhz burada innovasiya həyati əhəmiyyət daşıyır. Biz gələcək barədə fərqli düşünməli, müxtəlif ssenariləri və hazırda üzləşdiyimiz mürəkkəb geosiyasi reallıqları nəzərə almalıyıq. Hazırda bu tərəfdaşlığın praktik istiqamətlərini araşdırırıq və masada çoxlu ideyalar var. Şübhəsiz ki, "World Urban Forum" bu baxımdan vacib platformalardan biridir. İki ildən sonra növbəti Dünya Şəhərsalma Forumu Meksikada keçiriləcək.
“World Cities Report” kimi bilik məhsullarımız da əməkdaşlıq üçün praktik vasitələrə çevrilə bilər. Bundan əlavə, biz şəhər gündəliyini yenidən nəzərdən keçirir və mənzil məsələləri üzrə açıq işçi qrupunu dəstəkləyirik.
Bu gün UN-Habitat bir sıra mühüm hökumətlərarası proseslərdə iştirak edir. Hər il Nyu Yorkda keçirilən Yüksək Səviyyəli Siyasi Forumda Davamlı İnkişaf Məqsədlərinin icmalında iştirak edirik. Beləliklə, bizim praqmatik və effektiv şəkildə əməkdaşlıq etməyimiz üçün çoxsaylı mexanizmlər mövcuddur və məqsədimiz bu tərəfdaşlıq təşəbbüsündən yaranacaq bütün nəticələrin son nəticədə sizin hər biriniz üçün faydalı olmasını təmin etməkdir".
