“Su təsərrüfatı və meliorasiya işçiləri günü” peşə bayramı ərəfəsində “Şəki Sukanal” TSC, Tərtər və Daşkəsən sukanal sahələri üçün inşa edilmiş yeni inzibati binalar istifadəyə verilib.

“Azərsu” Açıq  Səhmdar Cəmiyyətindən Modern.az-a verilən məlumata görə, 

İşçilərin əmək şəraitinin yaxşılaşdırılması, həmçinin abonentlərə göstərilən xidmətlərin keyfiyyətinin yüksəldilməsi məqsədilə Şəki şəhərində ümumi sahəsi 630 kvadratmetr, Tərtər şəhərində 210 kvadratmetr, Daşkəsən şəhərində isə 180 kvadratmetr olan müasir tipli inzibati binalar tikilib. Yeni inzibati binalarda müştərilərin qəbulu, ödəmələrin aparılması üçün hər cür şərait yaradıımışdır. Binalarda işçi otaqları, İT otağı, iclas zalları yaradılıb. İnzibati binanın həyətində abadlıq və yaşıllaşdırma işləri aparılıb. 

Azərbaycan Respublikasının Prezidenti President İlham Əliyevin təsdiqlədiyi regionların sosial-iqtisadi inkişafı dövlət proqramları çərçivəsində respublikamızın şəhər və rayon mərkəzlərində içməli su təchizatı və kanalizasiya sistemlərinin yenidən qurulması məqsədilə genişmiqyaslı layihələr həyata keçirilib. İndiyədək layihələrin icra olunduğu 52 şəhər və rayon mərkəzinin 30-da içməli və tullantı su, 12-də isə içməli su şəbəkələrinin tikintisi yekunlaşıb. Bu layihələr çərçivəsində  içməli su təchizatı və tullantı su infrastrukturlarının yenilənməsi ilə yanaşı, yeni inzibati binaların tikintisi də nəzərdə tutulub. Artıq 17 şəhərdə yeni inzibati binalar tikilərək istifadə verilib, Qazax şəhərində isə inzibati binanın tikintisi cari ilin sonuna qədər başa çatdırılacaq.