“Şənbə-bazar günü fərqlənmə nişanı olan taksilər fəaliyyət göstərəcək”.
Bunu Modern.az-ın sorğusuna cavab olaraq, Nazirlər Kabineti yanında Operativ Qərargahdan bildiriblər.
Rəsmi məlumatda qeyd edilib ki, əvvəlki qərarlarda da məhdudlaşdırmalar çərçivəsində həftəsonları taksi xidmətlərinin fəaliyyətinə qadağa qoyulmayıb:
“İndi də hər hansı dəyişiklik yoxdur. Şənbə-bazar günü vətəndaşlar taksi xidmətindən istifadə edə biləcək. Narahatlıq üçün heç bir əsas yoxdur”.
Qeyd edək ki, karantin rejiminin sərtləşdirilməsi çərçivəsində rəsmi qurumlar tərəfindən şənbə-bazar günləri taksi xidmətinin fəaliyyətilə bağlı verilən təzadlı açıqlamalar vətəndaşlarda haqlı olaraq çaşqınlıq yaradıb.
Məlumat üçün bildirək ki, Nəqliyyat, Rabitə və Yüksək Texnologiylar Nazirliyinin rəsmi məlumatında şənbə-bazar günləri taksi xidmətinin fəaliyyətinə icazə verilməyəcəyi açıqlansa da, Daxili İşlər Nazirliyinin məlumatında bunun əksi yer alıb.