Pokistonning Lahor shahrida politsiya 20 yoshli Ozarbayjon fuqarosining guruh bo'lib jinsiy zo'ravonlikka uchragani haqidagi arizasidan so'ng jinoiy ish ochdi.
Modern.az mahalliy OAVga tayanib xabar berishicha, huquq-tartibot idoralari hodisa bilan bog'liq uch nafar gumonlanuvchining shaxsini aniqlagan va ularni hibsga olish bo'yicha operatsiya o'tkazmoqda.
Politsiya ma'lumotlariga ko'ra, yosh ayol biznes masalalari bilan bog'liq holda taxminan ikki hafta oldin Pokistonga kelgan. Uning arizasida aytilishicha, ikki ayol uni kafega taklif qilgan. Kafeda yana uch erkak ham bo'lgan.
Keyinroq ushbu shaxslar birgalikda bir kvartiraga olib borilgan. Jabrlanuvchining so'zlariga ko'ra, u yerda unga tarkibida noma'lum, ongni zaiflashtiruvchi modda bo'lgan ichimlik berilgan. Shundan so'ng uch erkak unga nisbatan jinsiy zo'ravonlik sodir etgan.
Ayolning ko'rsatmalariga ko'ra, zo'ravonlik butun tun davom etgan. Shundan so'ng gumonlanuvchilar uni aeroport yaqinida qoldirib, voqea joyidan ketishgan. Shuningdek, ayolning ikki qimmatbaho mobil telefoni, jumladan, “iPhone”i o'g'irlangani aytilmoqda.
Jinoiy ish Pokiston Jinoyat kodeksining guruh bo'lib zo'rlash va zaharlovchi yoki ongni zaiflashtiruvchi moddalardan foydalanish orqali zarar yetkazish uchun javobgarlikni nazarda tutuvchi moddalari bo'yicha Defence C politsiya bo'limida ro'yxatga olingan.
Politsiyaning tergov bo'yicha bosh inspektor o'rinbosari Sayed Zishan Raza barcha gumonlanuvchilarning shaxsi allaqachon aniqlanganini bildirdi.
Politsiya shuningdek, jinoyatni sodir etishda foydalanilgan deb taxmin qilingan avtomobilni musodara qildi.
Hozirda tergov davom etmoqda va huquq-tartibot idoralari gumonlanuvchilarni hibsga olish uchun qidiruv tadbirlarini amalga oshirmoqda.
