Polşanın xarici işlər naziri Radoslav Sikorski Avropa İttifaqının müdafiə qabiliyyətinin gücləndirilməsi məqsədilə “Avropa legionu”nun yaradılmasını təklif edib.
Modern.az xəbər verir ki, yerli jurnalistlərə açıqlamasında polşalı nazir deyib ki, söhbət Avropanın müxtəlif ölkələrindən peşəkarların, o cümlədən döyüş təcrübəsi olan Ukrayna Silahlı Qüvvələrinin veteranlarının cəlb oluna biləcəyi daimi silahlı qüvvələrin formalaşdırılmasından gedir.
Sikorski Aİ daxilində hərbi inteqrasiyanın daha da dərinləşdirilməsinin vacibliyini vurğulayıb. O bildirib ki, Avropa ölkələri yaranan təhlükələrin öhdəsindən ABŞ-dan daim yardım istəmədən müstəqil şəkildə gəlməyi bacarmalıdır.
Nazir Avropanın müstəqil cavab verməli olduğu təhdidlər sırasında həm ənənəvi hərbi təhlükələri, həm də Afrikadan və Yaxın Şərqdən gələn miqrasiya axınlarının hibrid silah kimi istifadəsini qeyd edib.
