İranın Kəşfiyyat Nazirliyi ölkənin cənub-şərqində hakimiyyətin “təkfirçi terror təşkilatı” adlandırdığı qruplaşmaya məxsus üç operativ hücrənin zərərsizləşdirildiyini açıqlayıb.
Modern.az xəbər verir ki, bu barədə “Tasnim” məlumat yayıb.
Nazirliyin məlumatına görə, əməliyyatlar zamanı 10 nəfər saxlanılıb, daha 2 nəfər isə hüquq-mühafizə orqanlarının əməkdaşları ilə toqquşma zamanı öldürülüb.
Nazirliyin açıqlamasında bildirilir ki, hücrələr hər hansı terror və ya diversiya əməliyyatı həyata keçirməyə imkan tapmamış aşkar edilərək zərərsizləşdirilib.
Əməliyyatlar Sistan və Bəlucistan əyalətinin İranşəhr, Sərbaz, Səravan və Zahidan şəhərlərində, həmçinin Hörmüzqan əyalətinin Kiş adasında yerli kəşfiyyat idarəsinin əməkdaşlarının iştirakı ilə keçirilib.
İran tərəfinin məlumatına görə, şübhəlilər xaricdən dəstəklənən qrupların üzvləri olublar. Nazirlik onların İrana daxil olmazdan əvvəl xaricdə hərbi hazırlıq keçdiyini, partlayıcı qurğular hazırlamaq və sui-qəsdlər törətmək üzrə təlim aldıqlarını bildirib.
İddialara görə, hücrə üzvləri gizli mənzillərdə gizlənib, diversiya törətməyi və bölgədə sabitliyi pozmağı planlaşdırıblar.
Əməliyyatda kəşfiyyat, polis və İslam İnqilabı Keşikçiləri Korpusunun əməkdaşları iştirak edib. Nazirlik şübhəlilərin müəyyən edilməsində yerli sakinlərin verdiyi məlumatların mühüm rol oynadığını bildirib.
Məlumata görə, saxlanılan şəxslərdən külli miqdarda silah və sursat götürülüb.
İranda həmçinin silahlı cinayətkar qruplara qarşı ayrıca əməliyyat keçirildiyi açıqlanıb. Kəşfiyyat əməkdaşları hakimiyyətin ictimai asayişi pozmaqda və təhlükəsizliyə təhdid yaratmaqda ittiham etdiyi iki mütəşəkkil dəstənin zərərsizləşdirildiyini bildiriblər.
Bu əməliyyat zamanı 5 silahlı şübhəli saxlanılıb. Onlardan da silah və digər avadanlıqların götürüldüyü açıqlanıb.
