Fevralın 9-da ölkədə növbədənkənar parlament seçkiləri keçiriləcək. Böyük əksəriyyət artıq öz namizədini, səs verəcəyi şəxsi müəyyənləşdirib.

Bəs, tanınmışlar kimə səs verəcək? Onlar seçəcəyi namizədi müəyyənləşdiribmi?

Modern.az bu sualla tanınmış simalara müraciət edib:

Xalq artisti, xanəndə Alim Qasımov seçkilərdə iştirak etmədiyini deyir:

“Kimə səs verəcəyim barədə düşünməmişəm. Ümumiyyətlə seçkilərdə, səsvermə prosesində iştirak etmirəm”.

Xalq artisti, rəssam heykəltəraş Ömər Eldarov isə ümumiyyətlə parlament seçkilərinin keçirilməsindən xəbərdar deyil:

“Birinci dəfədir eşidirəm ki, bu il parlament seçkiləri keçiriləcək.Kimə səs verəcəyimi də bu səbəbdən dolayı fikirləşməmişəm. İndi səhhətim qaydasında deyil, sağalım, seçkilər haqqında düşünəcəm”.

Dünya və Avropa çempionu,  Daxili İşlər Nazirliyinin “Dinamo” idman klubunun təmsilçisi Eduard Məmmədov təmsil etdiyi sahədən olan namizədlərə dəstəkdir:

“Yasamal rayon sakini kimi Azərbaycan Karate-do Federasiyaları Assosiasiyasının prezidenti Ülvi Quliyevə səs verəcəm. Amma qeyd edim ki, Azərbaycan Kikboksinq Federasiyasının prezidenti Adil Əliyevə də dəstəyəm. Sadəcə yalnız bir səs vermə hüququm olduğundan və Yasamal rayon sakini olduğumdan Ülvi Quliyevə səs verəcəm. Ülvi müəllimə səs verməyimdə səbəb odur ki, o hər bir idmançının dostudur. O bizə hər zaman dayaq olur, problemlərimizlə maraqlanır. İdmançılardan başqa Ülvi Quliyev ümumi əhalinin problemləri ilə də maraqlanır. Bundan əvvəl də mən və ailəm ona səs vermişik”.

Xalq şairi Fikrət Qoca səsvermədə iştirak etməyəcəyini bildirib:

“Artıq yaşım o yaş deyil ki, kiməsə səs verim. Namizədlər barədə elə bir düşüncəm də yoxdur. Hamının fəaliyyəti iş başında bilinir, namizədlər də müəyyən işlər görsünlər ki, seçim etmək mümkün olsun”.

Rəqqasə Fatimə Fətəliyeva güclü olan qazansın deyir:

“Kimə səs verəcəyimi hələ ki, bilmirəm. Amma kim layiqlidirsə, onun da deputat seçilməyini istəyirəm”.