Qlobal Jurnalistlər Şurası (KGK) oktyabrın 1-də Londonda Türkiyə–Böyük Britaniya münasibətlərinə həsr olunan sərgi və II Beynəlxalq Dostluq Mükafatları mərasimi keçirəcək.
Modern.az xəbər verir ki, Türkiyənin Londondakı səfirliyinin dəstəyi ilə təşkil olunan tədbir "Arundel House"da baş tutacaq. Əvvəlcə kolleksiyaçı professor Osman Kubilay Gülün arxivindəki qəzet manşetləri və diplomatik yazışmalar əsasında hazırlanmış “Sənədlərdən həyata Türkiyə–Böyük Britaniya münasibətləri” sərgisi açılacaq. Sərginin kuratoru doktor Özgenur Reyhan Gülərdir.
Ardınca KGK-nın II Beynəlxalq Dostluq Mükafatları təqdim ediləcək. Londonda çalışan türk jurnalistlər, eləcə də iki ölkə arasında əlaqələrin inkişafına töhfə verən britaniyalı jurnalistlər müxtəlif kateqoriyalar üzrə təltif olunacaqlar. Türkiyə–Böyük Britaniya dostluğuna dəstək göstərən dövlət xadimlərinə, vətəndaş cəmiyyəti təmsilçilərinə və qurumlara da mükafat və təşəkkür plaketləri veriləcək.
Tədbirdə iştirak edəcək təxminən 30 nəfərlik KGK nümayəndə heyəti sentyabrın 29-da Londona yola düşəcək. Heyət sentyabrın 30-da Türkiyənin Böyük Britaniyadakı səfiri O. Koray Ertaşın təşkil edəcəyi qəbulda iştirak edəcək, türk diasporunun nümayəndələri, parlament üzvləri və media təmsilçiləri ilə görüşəcək.
Nümayəndə heyətində Şimali Kipr Türk Respublikasının 5-ci Prezidenti Ersin Tatar fəxri qonaq qismində yer alır. Heyətin tərkibinə KGK-nın sədri Mehmet Ali Dim, Xarici Media Məclisinin sədri Elşad Eyvazlı, tanınmış jurnalist Yavuz Donat, Anadolu Agentliyinin baş direktor müavini Oğuz Karakaş, bələdiyyə rəhbərləri və KGK-nın müxtəlif ölkələrdəki təmsilçiləri də daxildir.
KGK sədri Mehmet Ali Dim bildirib ki, London görüşü Türkiyənin ictimai diplomatiyasına media vasitəsilə töhfə vermək məqsədi daşıyır:
“Bu tədbiri yalnız sərgi və mükafatlandırma mərasimi kimi deyil, Türkiyə ilə Böyük Britaniya arasında ünsiyyət və dostluq körpülərini gücləndirən ictimai diplomatiya fəaliyyəti kimi görürük. Jurnalistlər ölkələr arasındakı problemləri təkbaşına həll edə bilməzlər, amma toplumların bir-birini daha düzgün tanımasına kömək edə bilərlər”.
Mehmet Ali Dim tədbirin təşkilinə dəstək verən KGK-nın Böyük Britaniya təmsilçisi Vatan Özə, Konya Böyükşəhər, Keçiören və Sarıçam bələdiyyələrinə, ALTAV, ALTİD, Eftelia Hotels, EsteWorld və MÜSİAD Londona təşəkkür edib.
KGK nümayəndə heyətinin oktyabrın 2-də geri dönməsi nəzərdə tutulur.
