“Bu gün “Azərbaycan Demokratiya və Rifah Hərəkatı”nda (ADR) birləşən insanların əksəriyyəti Qubad İbadoğlunu dəstəkləyən, daha doğrusu, Müsavatdan kənar insanlardı. Bu, belə də olmalı idi”. Bunu Müsavat başqanının sabiq müavini Mehman Cavadoğlunun ADR-in sıralarına qoşulmasına münasibət bildirərkən Müsavat Partiyası Məclisinin sədri Nüşabə Sadıxlı deyib.
O, Modern.az saytına bildirib ki, bu seçim gözlənilən idi: “Mehman bəy uzun müddətdir şəxsi problemlərinə görə partiyaya gəlmirdi. Başqan seçkilərində də Qubad İbadoğlunu dəstəkləyən insanlardan biri idi. Bu cür seçim etmək onun haqqıdır.
Partiyadan istefa verib gedən insanların böyük əksəriyyəti uzun müddətdir şəxsi problemləri ilə əlaqədar Müsavatla əlaqəni çoxdan üzüblər. Belələrinin yalnız adları Müsavatda qalıb. Tək Mehman müəllim deyil, demək olar ki, istefa verib gedən insanların 80-90 faizi belədir. Belələri Müsavatın fəaliyyətində fəal iştirak etməyən, amma təmtəraqlı istefa verib, “Müsavat dağıldı” görüntüsünü yaratmaq istəyən insanlardı. Özlərini müsavatçı hesab edib sonradan nəyinsə naminə partiyadan getməklərinə təəccüb və təəssüflənirəm”.
Yeganə OQTAYQIZI
