Avropada İİV-ə yoluxma hallarının sayı dünyanın digər yerləri ilə müqayisədə daha sürətlə artır.

Modern.az xəbər verir ki, bunu Ümumdünya Səhiyyə Təşkilatının (ÜST) Avropa Regional Direktoru Hans Henri Kluj bildirib.

O, bu barədə dekabrın 1-də qeyd olunan Ümumdünya QİÇS-lə Mübarizə Gününə həsr olunmuş çıxışında danışıb. Klujun sözlərinə görə, Avropada bu tendensiya “on il ərzində dəyişməyib”. Oqeyd edib ki, regionun ayrı-ayrı ölkələrində vəziyyət fərqli ola bilər. 

“Regionumuzun bir sıra ölkələrində ölüm halları qəbuledilməz dərəcədə yüksəkdir, digərlərində İİV-in ötürülməsi demək olar ki, tamamilə dayanıb”, - deyə o bildirib. 

Qeyd edək ki, ÜST-ün Avropa regionuna 53 ölkə, o cümlədən Aİ ölkələri, Rusiya və MDB ölkələri daxildir.

Avropada İİV-ə yoluxma sayı 2022-ci ildə əvvəlki illə müqayisədə 3,4% artaraq təxminən 3,9 milyon nəfər təşkil edib. Müqayisə üçün qeyd edək ki, Afrikada artım 0,4% (25,6 milyon), Amerika qitəsində 2,7% (3,8 milyon), bütövlükdə dünyada isə 0,8% (39 milyon qədər) olub.