Fransa prezidenti Emmanuel Makron Türkiyə prezidenti Rəcəb Tayyib Ərdoğanla Ermənistan-Azərbaycan münasibətlərinin normallaşması məsələsini müzakirə edib.
Modern.az xəbər verir ki, bu barədə Fransa prezidentinin mətbuat xidməti məlumat yayıb.
“Respublika prezidenti (Makron - red.) regionda yeni səhifə aça biləcək sülh sazişinin tezliklə əldə edilməsi məqsədi ilə Ermənistan və Azərbaycan arasında davam edən dialoqa dəstəyimizi bir daha təsdiqlədi”, - bəyanatda deyilir.
NATO dövlət və hökumət başçılarının sammiti çərçivəsində Makron və Ərdoğan Rusiya-Ukrayna münaqişəsini və Yaxın Şərqdəki vəziyyəti də müzakirə ediblər.
Türkiyə mətbuatı xəbər verir ki, Ərdoğan Makrona Türkiyənin Avropa Birliyinə daxil olması prosesində Fransadan dəstək gözlədiyini deyib.
