Aytkurman Omarbekov Qozog‘iston mudofaa vazirining birinchi o‘rinbosari – Qurolli Kuchlar Bosh shtabi boshlig‘i etib tayinlandi. Modern.az xabariga ko‘ra, bu haqda “Kazinform” ma’lumot tarqatgan.
Tegishli farmonni Qozog‘iston Prezidenti Qosim-Jomart Toqayev imzolagan.
Aytkurman Omarbekov avvalgi lavozimidan ozod etilgan.
U 1977-yilda Abay viloyatida tug‘ilgan.
Omarbekov Rossiya Federatsiyasi Mudofaa vazirligining Harbiy universitetida “Ma’naviy-psixologik ta’minotni tashkil etish” va Yevroosiyo Gumanitar institutida “Huquqshunoslik” mutaxassisliklari bo‘yicha tahsil olgan.
Oilali, to‘rt farzandi bor.
1997-2014-yillarda Qozog‘iston Respublikasi Respublika gvardiyasida xizmat qilgan.
2014-2022-yillarda Qozog‘iston Respublikasi Davlat qo‘riqlash xizmatida turli ofitser va rahbar lavozimlarida ishlagan.
2022-yil yanvar oyida prezident farmoni bilan Qozog‘iston Respublikasi Davlat qo‘riqlash xizmati boshlig‘ining o‘rinbosari – Maxsus kuchlar qo‘mondoni vazifasini bajaruvchi etib tayinlangan.
O‘sha yilning fevral oyida esa Davlat qo‘riqlash xizmati boshlig‘ining o‘rinbosari – Maxsus kuchlar qo‘mondoni lavozimiga tayinlangan.
Prezidentning 2022-yil 22-oktabrdagi farmoni bilan unga Qozog‘iston Respublikasi Davlat qo‘riqlash xizmatining general-mayori maxsus unvoni berilgan.
Qayd etish joizki, Qozog‘iston Prezidenti 3-oktabr kuni Mudofaa vazirligining uch nafar rahbarini lavozimidan ozod etgan.
