Səhiyyə Nazirliyi Xüsusiləşdirilmiş Angioloji Mərkəzində xəstənin ayağının yanlışlıqla kəsilməsi hadisəsi barədə müvafiq qərar verib.
Qərara əsasən, Səhiyyə Nazirliyinin Xüsusiləşdirilmiş Angioloji Mərkəzinin direktoru Azər Şəmsəddinski və həkim-cərrah Valeh Kərimov işdən kənarlaşdırılıb.
Nazirliyin qərarı ilə bağlı Modern.az saytına danışan V.Kərimov səhvsiz insanın olmadığını deyib:
“Mənim işim davam edir. Hələ ki araşdırma gedir, sonrasına da Allah Kərimdir. Əgər səmimi danışsaq, həyatda səhvsiz insan olmur.
Mən rəhmətlik Fərman Salmanovla birgə işləmişəm. O vaxt quyular qazıldı neft çıxmadı, amma axırıncı quyudan neft çıxdı. Həyatdır, sınaq meydanıdır, hər şey ola bilər”.
Həkim “mən sağlam ayaq kəsməmişəm, fakt hər iki ayaq xəstə olub”,- deyərək bir daha özünə haqq qazandırmağa çalışıb.
Xatırladaq ki, iyunun 24-də Səhiyyə Nazirliyinin Xüsusiləşdirilmiş Angioloji Mərkəzində vətəndaş Məmmədova Tərlan Həsən qızı üzərində cərrahiyyə əməliyyatı aparılıb.
Əməliyyatı zamanı mərkəzin həkim-cərrahı Valeh Kərimov xəstənin sol ayağı əvəzinə, sağ ayağını amputasiya edərək kobud səhvə yol verib. Əməliyyatdan sonra həkim mexaniki olaraq səhv etdiyini açıqlayıb.
Gülşən RAUFQIZI
