Milli Məclisin İntizam komissiyasının sədri Eldar İbrahimov kənd təsərrüfatı və meşə təsərrüfatı məhsullarının itkisinin qarşısını almaq üçün Azərbaycanın bütün bölgələrində emal müəssisələrinin yaradılmasını təklif edib.
Deputat Modern.az-a açıqlamasında bildirib ki, 2027-ci ilin dövlət büdcəsi layihəsində ərzaq təhlükəsizliyi tədbirləri üçün 522,6 milyon manat, kənd təsərrüfatının inkişafına dair 2026–2030-cu illər üzrə Dövlət Proqramının maliyyələşdirilməsi üçün isə 240 milyon manat nəzərdə tutulub.
İbrahimovun sözlərinə görə, bölgələrdə emal müəssisələrinin yaradılması yerli istehsalçılar üçün satış imkanlarını genişləndirə, yeni iş yerləri aça və əlavə dəyər yarada bilər.
Komissiya sədri qeyd edib ki, layihədə 2027-ci il üzrə ümumi büdcə xərclərinin 20,7 faizinin müdafiə və milli təhlükəsizliyə yönəldilməsi nəzərdə tutulur. O, dünyanın müxtəlif bölgələrində müharibələrin davam etdiyi bir vaxtda Azərbaycanın müdafiə qüdrətinin artırılmasını vacib sayıb.
Deputat iqtisadi fəaliyyət üzrə xərclərin əsas hissəsinin iqtisadi dəstək tədbirlərinə ayrıldığını da vurğulayıb. Onun fikrincə, işğaldan azad edilmiş ərazilərin bərpası və yenidən qurulması üçün vəsaitin nəzərdə tutulması Böyük Qayıdış Proqramının icrasına xüsusi diqqətin davam edəcəyini göstərir. İbrahimov Naxçıvana göstərilən diqqətə görə də hökumətə təşəkkür edib.