İsrail parlamentinə – Knessetə müxalifətdəki “Yaşar” partiyasının üzvü Matan Kahana spiker seçilib.
Modern.az xəbər verir ki, bu barədə “Ynet” portalı məlumat yayıb.
Bildirilib ki, Kahananın namizədliyini 120 deputatdan 66-sı dəstəkləyib.
Yeni spiker ilk çıxışında İsrail xalqını barışığa çağırıb. O, bütün İsrail vətəndaşlarını təmsil etmək niyyətində olduğunu vurğulayıb.
“Yaşar” partiyasının lideri Qadi Ayzenkot da Kahananın spiker seçilməsini alqışlayıb. O bildirib ki, bu hadisə ölkə tarixində yeni səhifə açacaq.
Xatırladaq ki, oktyabrın 27-də İsraildə parlament seçkiləri keçirilib. Seçkilərin nəticələrinə əsasən, Baş nazir Benyamin Netanyahunun rəhbərlik etdiyi “Likud” partiyası 27 mandat qazanaraq birinci yeri tutub. Əsas müxalifət qüvvəsi olan “Yaşar” partiyası isə 21 mandatla ikinci olub.
Noyabrın 8-də İsrail Prezidenti İshak Hersoq Knessetə daxil olan partiyaların nümayəndələri ilə məsləhətləşmələrdən sonra “Yaşar” partiyasının lideri Qadi Ayzenkota yeni hökuməti formalaşdırmağı tapşırıb. Məsləhətləşmələrdə iştirak edən partiyaların əksəriyyəti hökumətin qurulması üçün məhz onun namizədliyini irəli sürüb.
Bundan sonra qanunvericiliyə əsasən, Ayzenkotun Knesset deputatlarının əksəriyyətinin dəstəyini qazanaraq hakim koalisiya formalaşdırması üçün 28 günlük müddət başlayıb. Zərurət yaranarsa, bu müddət daha 14 gün uzadıla bilər.
Əgər həmin müddətdə hökumət formalaşdırmaq mümkün olmazsa, yeni hökuməti qurmaq mandatı başqa namizədə veriləcək. Bu namizədə koalisiya yaratmaq üçün 28 gün vaxt ayrılacaq və həmin müddətin uzadılması nəzərdə tutulmur.