Türkiyə “Hizmet” hərəkatının ideoloqu Fətullah Gülənin ekstradasiyasına nail olmaq istəyirsə, onun dövlət çevrilişində iştirakına dair ciddi sübutlar təqdim etməlidir. Modern.az xarici mediaya istinadən bildirir ki, bunu ABŞ-ın dövlət katibi Con Kerri bəyan edib.
Onun sözlərinə görə, türkiyəli bəzi həmkarları ilə söhbətdə o açıq şəkildə deyib ki, Gülənin ekstradasiyası üçün əsassız iddialar yetərli olmayacaq: “Cənab Gülənə hörmət edərək biz həmişə Türkiyədəki dostlarımıza və müttəfiqimizə demişik ki, bizə sübut lazımdır”.
Kerri qeyd edib ki, ekstradasiya ilə bağlı Ankaranın yolladığı rəsmi sorğunu hələ görməyib və ABŞ-ın rəsmi şəxsləri onun tələb olunan formada olduğunu deyə bilməzlər. O bir daha təkrar edib ki, ABŞ üçün sübut vacibdir, iddia yox: “Bizə sübut təqdim edin!”
Kerrinin sözlərinə görə, ABŞ Türkiyədəki proseslərin inkişafını izləyir və bir daha Vaşinqtonun seçilmiş hakimiyyəti dəstəklədiyini təsdiqləyib: “Biz demokratik hakimiyyəti dəstəkləyirik, biz çevriliş cəhdini qınayırıq. Biz əmin olmaq istəyirik ki, çevrilişə cavab demokratiyaya hörmət əsasında olacaq”.
Modern.az
