Dövlət Sosial Müdafiə Fondu Hesablama Palatasının apardığı yoxlamalarla bağlı açıqlama yayıb.
DSMF-dən Modern.az-a verilən açıqlamada deyilir:
"Hesablama Palatasının Dövlət Sosial Müdafiə Fondunun kənar dövlət maliyyə nəzarəti tədbirinin nəticələri haqqında Baş Prokurorluğa göndərdiyi məlumatda qeyd olunan 51 nəfərin pensiyası 2013-cü ilin may ayınadək olan dövrdə təyin olunub. Pensiya təyin olunmuş həmin şəxslərin şəxsiyyət vəsiqəsində doğum tarixi haqqında məlumatların saxtalaşdırması halları aşkarlanıb.Sığorta haqlarının şəxsi hesablarda əks etdirilməsi üçün son illər DSMF tərəfindən mühüm işlər aparılır. Hələ 2006-2016-cı illərdə ödənilən, lakin işçilərin fərdi hesabları üzrə bölüşdürülməmiş 1,2 milyard manat vəsait artıq fərdi hesablara bərkidilib ki, bu da sosial sığorta iştirakçılarının hüquqlarının qorunmasına yönələn mühüm addımdır. DSMF Maliyyə Hesabatlarının Beynəlxalq Standartlarına uyğun şəkildə bu il ilk dəfə konsolidə edilmiş maliyyə hesabatını audit rəyi ilə birlikdə dərc edib. Hesabatın dərci Fondun fəaliyyətində şəffaflığın göstəricisidir".
Qeyd edək ki, 7 fevral 2006-cı il - 22 oktyabr 2013-cü il tarixlərində əmək və əhalinin sosial müdafiəsi naziri Füzuli Ələkbərov olsa da, Dövlət Sosial Müdafiə Fondunun sədri Səlim Müslümov olub. O, 2002 - 2013-cü illərdə bu vəzifəni icra edib. 2016-cı ildən isə Fond ƏƏSMN-in tabeliyinə verilib.
Xatırladaq ki, Hesablama Palatası DSMF-də yoxlama aparıb, nöqsanlar aşkarlayıb, 612 min manat vəsaitin büdcəyə bərpa olunmasını təmin edib.
