Bu gün daxili işlər naziri Ramil Usubov tanınmış hüquqşünas Aslan İsmayılovu qəbul edib. Modern.az saytının xəbərinə görə, bu barədə Aslan İsmayılov özü məlumat verib. A.İsmayılovun sözlərinə görə, bir saatdan artıq sürən görüş zamanı ona çox hörmətlə yanaşılıb, söylədikləri təmkinlə dinlənilib.
“Söhbətdən anladığım o oldu ki, dediklərimi sübuta yetirə bilmədiklərindən heç kimə qarşı tədbir görülməyəcək. Atacağım addımların məsuliyyətini dərk edirəm. Görüşdə dediklərimi bir daha təkrar edirəm. Mənə qarşı cinayət törədənlər, Rəşad Ramazanovun cibinə narkotik qoyanlar cəzalandırmayınca, mübarizəmdən əl çəkən deyiləm. Bu yolda mənə qarşı atılacaq hər bir qanunsuzluğa hazıram”-deyə A.İsmayılov bildirib.
Daha sonra o, əlavə edib: “Bu günə qədər mənə qarşı olan qanunsuzluqlarla bağlı DİN-nin Daxili Təhqiqatlar İdarəsinin rəisi Rasim Musayev, daxili işlər nazirinin müavini Vilayət Eyvazov və nəhayət bu gün nazir Ramil Usubov heç olmasa məni qəbul edib, hörmətlə dinləyiblər. Görəsən bu işin araşdırılmasına qanunla birbaşa cavabdeh olan, vaxtı ilə özümün də 4 il çalışdığım Respublika Prokurorluğuna başçılıq edən, məni şəxsən tanıyan ölkənin Baş prokuroru Zakir Qaralov və onun tabeçiliyində olanlar niyə susurlar? Bu addımın başqa hallarını sadalamıram, heç olmasa qanuna hörmətsizlik olduğunu anlayırlarmı?”.
