Penitensiar Xidmət Nemət Pənahlının həyat yoldaşına ittihamlarına cavab verib. Xatırladaq ki, 7 saylı Cəzaçəkmə Müəssisəsindən Qobustan həbsxanasına köçürülən Nemət Pənahlı hazırda karantində saxlanır. Karantin müddəti iyulun 3-də bitəcək məhbusun Həcər Pənahlı bildirib ki, N. Pənahlıya qarşı qanunsuz əməllərə yol verilib. Həcər Pənahlı Nemət Pənahlıya yeni vəkil tutacaqlarını da söyləyib. Qeyd edək ki, bu vaxtadək Nemət Pənahlının hüquqlarını vəkil Elçin Əliyev müdafiə edib.
Penitensiar Xidmətin ictimaiyyətlə əlaqələr şöbəsinin müdiri Mehman Sadıqov Modern.az-a bildirib ki, Nemət Pənahlı Qobustan həbsxanasına 17 saylı Cəzaçəkmə Müəssisəsi rəisinin təqdimatı əsasında köçürülüb. M. Sadıqov əlavə edib ki, Nemət Pənahlı daxili intizam qaydalarına riayət etmədiyindən ona qarşı bu tədbir seçilib.
“Məhkum olunmamışdan əvvəl hansı işlə məşğul olmağından, siyasi əqidəsindən, partiya mənsubluğundan asılı olmayaraq istənilən məhkum, təqsirləndirilən şəxs daxili intizam qaydalarına riayət etməlidirlər. Bu qanunun tələbidir. Burada heç kimə istisnalar olunmur. Daxili intizam qaydaları mövcuddur və hər bir məhkumun borcudur ki, daxili intizam qaydalarına əməl etsin. İntizam qaydalarına riayət edilmədiyi halda qanunvericilikdə müəyyən tədbirlərin görülməsi nəzərdə tutulub. Əvvəl onunla söhbət edilir. Məhkuma onun hərəkətlərinin qanuna zidd olduğu və bu əməllərin hansı fəsadlar verə biləcəyi izah olunur. Əgər məhkum bu cür əməllərinə davam edirsə tənbeh tədbirləri görülür. Bütün bu tədbirlər heç bir nəticə vermirsə o zaman məhkəməyə təqdimat yazılır və məhkəmə qərarı ilə həmin məhkum həbsxana rejiminə keçirilir. Orada yüzlərlə məhkum saxlanılır. Niyə ancaq Nemət Pənahlının adı çəkilir. Çünki o daxili intizam qaydalarına riayət etməyib və həbsxana rejiminə keçirilib”.
