Türkiyənin Cümhuriyyət Xalq Partiyasının (CHP) sədri Özgür Özel partiya daxilində keçirilə biləcək sədr seçkisi ilə bağlı keçmiş sədr Kamal Kılıçdaroğluna açıq çağırış edib.
Modern.az xəbər verir ki, Özel CHP-nin parlamentdəki qrup iclasında çıxışı zamanı iki milyon partiya üzvünün iştirakı ilə ümumpartiya seçkisinin keçirilməsini təklif edib.
O bildirib ki, sədr postu uğrunda Kılıçdaroğlu ilə yarışmağa hazırdır.
"Kamal Kılıçdaroğluna çağırış edirəm. İki milyon üzvlə seçki keçirək, ikimiz yarışaq. Məğlub olan CHP-ni rahat buraxsın, siyasətdən getsin. Əgər mən 90 faizdən aşağı səs toplasam, siyasəti tərk edəcəyəm", - deyə Özel vurğulayıb.
CHP lideri çıxışında ölkədə iqtisadi vəziyyəti, yüksək inflyasiyanı və vergi siyasətini də tənqid edib. O, Türkiyənin 2018-ci ildən bəri davam edən iqtisadi böhran yaşadığını bildirərək, gəlir bölgüsündə və vergi sistemində ciddi ədalətsizliyin olduğunu iddia edib.
Özel həmçinin son dövrlər CHP-li bələdiyyə sədrlərinə qarşı aparılan istintaqları siyasi motivli adlandırıb və partiyasının iqtidara gəlmək hədəfindən geri çəkilməyəcəyini bildirib.
