Milli Məclisin iclasında Şuşanın işğalı ilə bağlı məsələdə mübahisə düşüb.
Modern.az-ın məlumatına görə, deputat Sabir Rüstəmxanlı deyib ki, Şuşanın Azərbaycanın bəzi qüvvələrinin xəyanəti nəticəsində işğal edilməsi barədə fikirlər yanlışdır:
“Bəzi cavan deputatlar o dövrdəki hadisələrin içində olmayıblar, səthi məlumatlarla çıxışlar edirlər. Biz Şuşada bu qədər şəhid vermişik. AXC-Müsavat iqtidarını tənqid etmək olar, amma xəyanətdə ittiham etmək o anlama gəlir ki, guya Şuşanı Ermənistan işğal etməyib. Bu yanaşmaya son qoyulmalıdır”.
Milli Məclis sədrinin birinci müavini Əli Hüseynli isə cavab olaraq deyib ki, Azərbaycanda Şuşanın işğalına hüquqi qiymət verilib:
“Sabir müəllim, burda heç kim demədi ki, Şuşa Ermənistan tərəfindən işğal edilməyib. Azərbaycan Şuşanın işğalına hüquqi qiymət verib”.
Ə.Hüseynlinin bu cavabı YAP-çı deputatların alqışına səbəb olub.
Qeyd edək ki, parlamentin iclasında deputatlar Siyavuş Novruzov və Cavid Osmanov AXC-Müsavat cütlüyünü xəyanətdə ittiham edən fikirlər səsləndiriblər.
