"Barselona"nın İspaniya Kral Kuboku finalında "Atletik Bilbao"nu 4-0 məğlub edərək kuboku 31-ci dəfə öz muzeyinə apardığı matç həm də Lionel Messinin yeni rekordları ilə yadda qaldı.
Modern.az xəbər verir ki, matçda iki qol vuran argentinalı hücumçu 119 illik kubok tarixində 7 fərqli finalda qol vuran ilk oyunçu oldu.
"Barselona"nın kapitanı 10 final matçında 9 qol vuraraq Telmo Zarradan da üstün oldu və İspaniya Kral Kubokunun final tarixində ən çox qol vuran futbolçu rekordunu ələ keçirdi.
Lionel Messi həmçinin, ardıcıl 13-cü mövsümündə 30 qol həddini keçərək təkrarlanması çox çətin olan bir uğur qazandı.
Bundan başqa, Messi "Barselona" oyunçusu kimi ən çox titul qazanan futbolçu oldu. "Barselona" ilə 35-ci kubokunu əldə edən argentinalı bununla da bir klubda ən çox titul qazanan Ryan Giggsin ("Mançester Yunayted"lə 34 kubok) rekordunu qırdı.
T.İSMAYIL
