ABŞ dövlət katibinin müavini Filip Qordon Türkiyədə qanunsuz yaşayan 100 min erməninin ölkə ərazisindən deportasiya olunması barədə baş nazir Rəcəb Tayyib Ərdoğanın verdiyi bəyanata dəstək verib. Modern.az türk mətbuatına istinadən xəbər verir ki, Vaşinqtonda keçirdiyi ənənəvi brifinqdə Qordon bu məsələyə də toxunub. “Ərdoğan ölkəsində qanunsuz yaşayan 100 min erməninin olduğunu söylədi. Onları deportasiya etməklə təhdid etdiyini düşünmürəm. Bu məsələ başqa mövzudur. Hər ölkədə qanunsuz yaşayan miqrant problemi var. Hər bir ölkə öz qanunlarına müvafiq olaraq bu problemləri həll edir. Bu məsələnin Nümayəndələr palatası və ya ABŞ-dakı hər hansı bir səsvermə ilə əlaqəsi yoxdur. ABŞ Konqresinin fəaliyyətləri ilə bunun arasında bağlantı qurmayın”,-deyə Qordon bildirib.
