AQShning mashhur moda brendi “Ralph Lauren”ning rasmiy “Instagram” sahifasida isroillik aktrisa Gal Gadotning suratlarini joylashtirishi ijtimoiy tarmoqlarda noroziliklarga sabab bo‘ldi.
Modern.az xabar berishicha, International "Business Times" nashrining ma’lumotlariga ko‘ra, 9-sentabrda e’lon qilingan postdan so‘ng foydalanuvchilar brendni boykot qilishga chaqirishgan.
Suratlar “The Jaffa Hotel”da fotograf Tal Abadi tomonidan olingan. “Mo‘jiza ayol” obrazi bilan tanilgan Gal Gadot “Ralph Lauren”ning 2026-yil kuzgi kolleksiyasidan oltin rangli libos va poyabzalda kamera qarshisiga chiqqan.
Brend post izohida “Aktrisa Gal Gadot “Modern Luxury” jurnalining muqovasida porlamoqda” iborasini ishlatgan.
Post 16,7 milliondan ortiq obunachisi bo‘lgan brend sahifasida keskin reaksiyalarga sabab bo‘ldi. Foydalanuvchilarning bir qismi kompaniya mahsulotlaridan voz kechishga chaqirib, “Alvido, Ralph Lauren”, “Sionistlar bo‘lmasin” va “Katta umidsizlik” kabi izohlar yozishgan.
Shu bilan birga, ba’zi foydalanuvchilar brendni himoya qilib, boykot chaqiriqlarini istehzo bilan kutib olishgan. Ular kompaniya asoschisi Ralph Laurenni eslatishgan.
Qayd etish joizki, 1939-yilda Nyu-Yorkda tug‘ilgan Ralph Laurenning asl familiyasi Lifshits bo‘lgan. U Sharqiy Yevropadan AQShga ko‘chib kelgan yahudiy muhojir oilasida dunyoga kelgan. Kelajak dizayner 16 yoshida familiyasini Lauren deb o‘zgartirgan.
“Ralph Lauren” kompaniyasi rahbariyati ijtimoiy tarmoqlardagi muhokamalar yuzasidan hozircha rasmiy bayonot bermagan.
