Rossiyadan Ozarbayjonga 1 million rubldan ortiq naqd rubl olib chiqish cheklandi.
Modern.az xabariga koʻra, bu Rossiya Prezidenti Vladimir Putin imzolagan farmonda oʻz aksini topgan. Yangi qoida Yevroosiyo Iqtisodiy Ittifoqiga aʼzo davlatlar bilan bir qatorda Ozarbayjon, Tojikiston va Oʻzbekistonga ham tegishli. Yuridik shaxslar va yakka tartibdagi tadbirkorlar uchun cheklov olib chiqilayotgan summa miqdoridan qatʼi nazar qoʻllaniladi.
Farmonda istisno nazarda tutilgan: agar jismoniy shaxs hukumat tomonidan belgilangan xalqaro aeroport orqali oʻtsa va naqd rubl bank hisobvaragʻidan yechib olinganligini tegishli hujjatlar bilan tasdiqlasa, 1 million rubldan ortiq summani olib chiqishi mumkin. Xalqaro tashishlar va diplomatik ehtiyojlar bilan bogʻliq holatlar uchun ham alohida istisnolar belgilangan.
Qoida buzilgan taqdirda, jismoniy shaxs olib chiqqan 1 million rubldan ortiq qismi, yuridik shaxs va yakka tartibdagi tadbirkor olib chiqqan barcha naqd rubl musodara qilinadi. Farmon rasmiy eʼlon qilingan kundan boshlab kuchga kirgan.
