Qozogʻiston prezidenti Qosim-Jomart Toqayev mamlakatda amalga oshirilayotgan islohotlar barcha sohalarni qamrab olganini va bu jarayon davom ettirilishini maʼlum qildi.
Modern.az xabar berishicha, prezident bu haqda mamlakatning oliy maslahat organi boʻlgan Xalq Kengashi sessiyasida soʻzlagan nutqida aytib oʻtgan.
“Hozirda Qozogʻiston keng koʻlamli transformatsiya davrini boshdan kechirmoqda. Jamiyatimiz hayotining barcha sohalarida chuqur islohotlar amalga oshirilmoqda. Biroq oʻzgarishlar shu bilan yakunlandi, deb aytish mumkin emas. Ular albatta davom ettiriladi”, – dedi prezident.
Toqayev eslatib oʻtdiki, 2026-yilda mamlakatda yangi Konstitutsiya qabul qilingan. Keyinchalik uning asosida yangi, bir palatali parlamentga – Qurultoyga saylovlar oʻtkazilgan, vitse-prezident tayinlangan, Xalq Kengashi shakllantirilgan va Qozogʻiston Xavfsizlik Kengashi apparati tashkil etilgan.
Prezidentning taʼkidlashicha, respublika faol rivojlanmoqda va soʻnggi yetti yil ichida – Toqayev 2019-yilda prezident etib saylanganidan beri – mamlakat fuqarolari “nafaqat islohotlarning bevosita guvohi boʻlgan, balki ularning natijalarini ham his etmoqdalar”.
Toqayev, shuningdek, Astanada muntazam ravishda yuqori darajadagi tadbirlar oʻtkazayotganini va boshqa davlat rahbarlari bilan muzokaralar olib borayotganini maʼlum qildi.
“Oldimga qoʻygan maqsadim butunlay aniq – Qozogʻistonni xalqaro maydonda oʻrta kuch sifatida taqdim etish, tariximiz va madaniyatimizni xalqaro miqyosda targʻib qilish, davlat manfaatlarimizni himoya qilish va Qozogʻiston imkoniyatlarini ilgari surish. Mening boshqa niyatim yoʻq”, – deya taʼkidladi Toqayev.
Uning soʻzlariga koʻra, bu Qozogʻiston xalqining umumiy maqsadidir.
