Millət vəkili Vahid Əhmədov Quba rayonunda seçiciləri ilə görüşüb. Deputatın qərargahında Modern.az-a verilən məlumata görə, rayonun Zərdabi və Hacıqayıb kəndlərində baş tutan görüşlərdə keçən müddət ərzində görülmüş işlər barədə məlumat verən millət vəkili əhalini narahat edən məsələlərlə də yaxından tanış olub.
Payızın gəlişi və məhsulun yığımı ilə bağlı kənd camaatını ən çox qayğılandıran məsələlər- məhsulun satışı və saxlanması geniş müzakirə mövzusu olub. Bu yaxınlarda problemin ölkə prezidenti səviyyəsində qaldırıldığını və müvafiq tədbirlərin görüləcəyini deyən millət vəkili məsələnin nəzarətə götürüldüyünü qeyd edib. Bir çox digər suallar ətrafında da müzakirələr aparılıb.
Sonradan Quba şəhərində yerləşən ofisdə vətəndaşların qəbulu aparılıb. Qəbula gələn 28 seçici deputat tərəfindən qəbul edilib. Əsasən işsizlik, mənzillərlə təminat, torpaqların verilməsi və təsərrüfat qayğıları ilə bağlı məsələlər qəbula gələnlər tərəfindən tez-tez səsləndirilib. Bəzi problemlərlə bağlı operativ qərarlar qəbul edilib, həlli vaxt tələb edən məsələlər nəzarətə götürülüb.
Modern.az
