Qırğızıstan hakimiyyəti Bişkekdən İssık-Kul gölünə qədər ödənişli avtomobil yolunun tikintisi məqsədilə Qazaxıstana sərhədyanı ərazilərin mübadiləsini təklif edib.
Modern.az xəbər verir ki, bu barədə Qırğızıstan Prezident Administrasiyasının mətbuat katibi Daırbek Alaqözov məlumat verib.
Onun sözlərinə görə, hazırda İssık-Kula aparan marşrutun bir hissəsi Qazaxıstan ərazisindən keçir. Söhbət tranzit zona hesab olunan təxminən 800 metrlik yol hissəsindən gedir.
Alaqözov bildirib ki, yeni ödənişli yol layihəsinin reallaşdırılması üçün həmin hissə ilə bağlı ərazi mübadiləsi variantı nəzərdən keçirilir.
Qırğızıstanın bunun müqabilində Qazaxıstana hansı torpaq sahələrini təklif etdiyi isə açıqlanmayıb.
