Hər il 26 İyun Azərbaycanda böyük qürur və iftixar hissi ilə qeyd olunan Silahlı Qüvvələr Günüdür. Bu əlamətdar tarix Azərbaycan Ordusunun keçdiyi şərəfli yolu, dövlətimizin müstəqilliyinin və ərazi bütövlüyünün qorunmasında göstərdiyi misilsiz xidmətləri bir daha xatırlatmaq üçün mühüm əhəmiyyət daşıyır.
Lakin müstəqilliyin ilk illərində ölkədə hökm sürən siyasi böhran, hakimiyyət uğrunda çəkişmələr və idarəetmədəki ciddi problemlər ordunun formalaşmasına mənfi təsir göstərirdi. Məhz belə bir mürəkkəb dövrdə xalqın təkidli tələbi ilə Ümummilli Lider Heydər Əliyevin 1993-cü ildə yenidən hakimiyyətə qayıdışı Azərbaycan dövlətçiliyini xilas etməklə yanaşı, milli ordu quruculuğunda da yeni mərhələnin başlanğıcını qoydu.
Ulu Öndər Heydər Əliyev Azərbaycan Ordusunun vahid komandanlıq əsasında formalaşdırılması, nizami hərbi hissələrin yaradılması, hərbi intizamın möhkəmləndirilməsi və peşəkar zabit korpusunun hazırlanmasını dövlət siyasətinin əsas istiqamətlərindən birinə çevirdi. Məhz onun rəhbərliyi ilə Azərbaycan Ordusunun hüquqi bazası yaradıldı, hərbi quruculuq sistemli xarakter aldı və Silahlı Qüvvələr dövlətin etibarlı dayağına çevrildi.
Azərbaycanın hərbi kadr potensialının formalaşdırılmasında Ümummilli Liderin hələ sovet dövründə həyata keçirdiyi uzaqgörən siyasət xüsusi rol oynamışdır. 1971-ci ildə Bakıda Cəmşid Naxçıvanski adına Hərbi Liseyin yaradılması milli hərbi kadrların hazırlanması istiqamətində mühüm addım oldu. Bu təhsil ocağında yetişən minlərlə gənc sonradan Azərbaycan Ordusunun zabit korpusunun əsasını təşkil etmiş, ölkəmizin müdafiə qabiliyyətinin gücləndirilməsində mühüm xidmətlər göstərmişdir. Uli Öndər Heydər Əliyevin əsasını qoyduğu ordu quruculuğu siyasəti Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev tərəfindən uğurla davam etdirilmişdir. Son illər ərzində dövlətimizin iqtisadi imkanlarının artması nəticəsində ordunun maddi-texniki bazası əsaslı şəkildə möhkəmləndirilmiş, Silahlı Qüvvələr ən müasir silah və texnika ilə təchiz edilmişdir.
Prezident İlham Əliyevin rəhbərliyi ilə Azərbaycan Ordusunda genişmiqyaslı islahatlar həyata keçirilmiş, idarəetmə sistemi təkmilləşdirilmiş, döyüş hazırlığı daha da gücləndirilmişdir. Müasir döyüş təcrübəsinin öyrənilməsi, beynəlxalq hərbi əməkdaşlığın genişləndirilməsi və peşəkar kadr hazırlığının inkişaf etdirilməsi nəticəsində Azərbaycan Ordusu regionun ən güclü ordularından birinə çevrilmişdir. Ordu quruculuğunun mühüm istiqamətlərindən biri də ölkəmizdə hərbi sənayenin inkişafıdır. Azərbaycan Respublikasında müdafiə sənayesi müəssisələrinin yaradılması və istehsal imkanlarının genişləndirilməsi nəticəsində müxtəlif təyinatlı silahlar, sursatlar, pilotsuz uçuş aparatları və digər hərbi məhsullar istehsal olunmağa başlanmışdır. Bu isə ölkəmizin müdafiə potensialının daha da güclənməsinə və xarici asılılığın azalmasına mühüm töhfə vermişdir. Dövlət tərəfindən hərbi qulluqçuların sosial müdafiəsinin gücləndirilməsi istiqamətində də mühüm tədbirlər həyata keçirilmişdir. Şəhid ailələri, qazilər və hərbi qulluqçular daim dövlət qayğısı ilə əhatə olunmuş, onların mənzil-məişət şəraitinin yaxşılaşdırılması, sosial rifahının yüksəldilməsi istiqamətində mühüm proqramlar reallaşdırılmışdır. Azərbaycan Ordusunun qüdrəti və peşəkarlığı xüsusilə 2020-ci ilin 44 günlük Vətən müharibəsində bütün dünyaya nümayiş etdirildi. Müzəffər Ali Baş Komandan İlham Əliyevin rəhbərliyi altında Azərbaycan Ordusu 30 ilə yaxın işğal altında qalmış torpaqlarımızı azad etdi, düşmən üzərində tarixi qələbə qazandı və xalqımıza böyük Zəfər sevincini yaşatdı. Vətən müharibəsi zamanı Azərbaycan əsgəri yüksək döyüş ruhu, peşəkarlığı və qəhrəmanlığı ilə dünya hərb tarixində yeni səhifə yazdı. 2023-cü ilin sentyabr ayında həyata keçirilən lokal xarakterli antiterror tədbirləri nəticəsində isə ölkəmizin suverenliyi tam bərpa edildi. Cəmi bir neçə saat ərzində qarşıya qoyulan bütün vəzifələr yüksək peşəkarlıqla yerinə yetirildi və Azərbaycan Respublikasının konstitusiya quruluşu bütün ərazilərimizdə təmin olundu. Bu uğur Azərbaycan Ordusunun yüksək hazırlıq səviyyəsinin və gücünün növbəti təzahürü oldu. Bu gün Azərbaycan Silahlı Qüvvələri dünyanın qabaqcıl orduları sırasında öz layiqli yerini tutmuşdur. Müasir texnologiyalarla təchiz olunmuş, yüksək döyüş qabiliyyətinə malik və peşəkar kadr potensialına sahib olan Azərbaycan Ordusu dövlətimizin müstəqilliyinin, ərazi bütövlüyünün və xalqımızın təhlükəsizliyinin etibarlı təminatçısıdır. Əminik ki, qalib Azərbaycan Ordusu bundan sonra da dövlətimizin qüdrətinin, xalqımızın qürur mənbəyinin və müstəqilliyimizin sarsılmaz dayağı olaraq yeni uğurlara imza atacaqdır.
Bugün həm də ordumuzun inkişafı, torpaqlarımızın işğaldan azad olunması və ərazi bütövlüyümüzün təmin edilməsi uğrunda misilsiz qəhrəmanlıq göstərərək şəhidlik zirvəsinə ucalmış igid hərbçilərimizi dərin hörmət və ehtiramla yad edirik. Onların əziz xatirəsi xalqımızın qəlbində daim yaşayacaq, qəhrəmanlıqları gələcək nəsillər üçün örnək olacaqdır.
Vətən müharibəsi iştirakçılarına, qazilərimizə və bütün hərbi qulluqçularımıza Uca Allahdan möhkəm can sağlığı, uzun ömür və müqəddəs xidmətlərində yeni-yeni uğurlar arzulayırıq. Ordumuzun qüdrəti daim artsın, Vətənimizin keşiyində duran bütün əsgər və zabitlərimizə şərəfli fəaliyyətlərində müvəffəqiyyətlər diləyirik. Uca Allah müzəffər Ali Baş Komandanımızı, cənab Prezidentimizi, rəşadətli Azərbaycan Ordusunu, doğma Vətənimizi və müstəqil dövlətimizi qorusun. Dövlətimizin qüdrəti, xalqımızın birliyi və ordumuzun gücü daim olsun.
Həbib Misirov
YAP Kəlbəcər rayon təşkilatının sədri
