AŞPA-ya gedəcək siyahı Novruz əfvindən asılıdır | Modern.az

Avropa Şurasının Parlament Assambleyasının (AŞPA) Azərbaycan üzrə həmməruzəçisi Kristofer Ştrasserin siyasi məhbuslarla bağlı təqdim etdiyi siyahı iflasa uğrayandan sonra hüquq müdafiəçiləri siyasi məhbuslarla bağlı yeni siyahının hazırlanmasına başlayıblar. Dilarə Əliyeva adına Qadın Hüquqlarının Müdafiə Cəmiyyətinin sədri Novella Cəfəroğlu Modern.az-a bildirib ki, AŞPA-nın yaz iclasına kimi yeni siyahı hazır olacaq.   

Digər hüquq müdafiəçisi Səidə Qocamanlı isə bildirdi ki, siyasi məhbuslarla bağlı siyahı köhnədir. Onun dediyinə görə, bəzi məhkəmələr hələ ki, davam etdiyindən və Əvəz Zeynalının məhkəməsi yekunlaşmaq üzrə olduğundan həmin məhkəmələrin nəticələri siyahıda dəyişikliyə gətirib çıxaracaq: “Əgər Novruz bayramı ərəfəsində kimsə azadlığa buraxılsa, əfv fərmanı olsa təbii ki, bizim siyahımızda korrektələr ediləcək. Biz yeni siyahı hazırlamamışıq. Çünki yanvar sessiyasında siyahıya baxılıb. Ona görə də siyahımız yenilənməyib. Dekabr ayındakı siyahıdır. Əvəz Zeynallının məhkəməsi bitəndən sonra o da həmin siyahıya salınacaq. Üç aydan sonra əfv fərmanı ola bilməz. Buna baxmayaraq əgər əfv fərmanı imzalansa bizim siyahıda olanlardan kimsə azadlığa çıxsalar təbii ki, siyahımızda korrektələr ediləcək”.  

Hüquq Müdafiə Təşkilatları Monitorinq Qrupunun üzvü, millət vəkili Çingiz Qənizadə bildirib ki, Ştrasserin şişirdilmiş, faktlara əsaslanmayan siyahısı iflasa uğrayıb. Onun sözlərinə görə, Monitorinq Qrupu Avropa Şurası ilə sıx əməkdaşlıq edir. Hüquq müdafiəçisi bildirib ki, onların siyahısında  8-10 məhbus var. “Amma həmişə demişəm ki, Avropa Şurasına siyahı təqdim edib onlara hansısa ölkəyə təzyiq etmək düzgün addım deyil. Biz hüquq müdafiə təşkilatlarının Monitorinq Qrupu olaraq hər şeyin ölkədə dialoqla həll olunmasının tərəfdarıyıq. Bu siyahı müvafiq qurumları ilə mütəmadi görüşlər zamanı qaldırılır. Siyahıda olan 10 nəfər barəsində danışıqlar aparılıb. Cənab prezidentə də sağ olsun ki, əfv fərmanında hər dəfə bu insanlardan kimisə əfv etməklə siyahıda olan insanların sayını azaldıb. Mətbuatda gedən məlumatlara görə də Novruz bayramı ərəfəsində də əfv fərmanı olacaq. Təşkilatımızda olan 10 nəfər siyahını da göndərmiş və bildirmişik ki, siyahıda olan 10 nəfərin azadlığa buraxılması müzakirə mövzusu olsun”.

Gültəkin Ələsgər