Kəlbəcər rayonunun işğalının 20 illiyi ilə bağlı Moskvada anım mərasimi keçirilib. Modern.az-ın məlumatına görə, mərasimdə Rusiyada yaşayan azərbaycanlı ziyalılar, iş adamları, diaspor nümayəndələri ilə yanaşı Moskvada məskunlaşmış kəlbəcərlilərdə iştirak ediblər.
Tədbiri giriş sözü ilə açan Azərbaycan Yazıçılar Birliyinin Moskva bölməsinin katibi şair Nəsib Nəbioğlu mərasim iştirakçılarını salamlayıb.
Sonra Kəlbəcərin işğalı zamanı şəhid olan, Qarabağ uğrunda canından keçən şəhidlərimizin ruhu bir dəqiqəlik sükutla yad edilib.
Nəsib Nəbioğlu çıxışında bildirib ki, bu gün Azərbaycan xalqı, ilk növbədə kəlbəcərlilər üçün çox ağır bir gündür. “Kəlbəcərin işğalından 20 - il ötməsinə baxmayaraq, torpaqlarımız işğal altında qalmaqdadır. Kəlbəcərin işğalıyla bağlı BMT Təhlükəsizlik Şurası 822 saylı qətnamə qəbul edib. Amma bu və digər qətnamələr yerinə yetirilməyib və yetirilməyəcək. Bunlara inanmaq lazım deyil. ATƏT-n apardığı danışıqlar, bütün bunlar hamısı cəfəngiyyatdır. İndən belə hələ çox iyirmi illər gözləməli olacağıq. Biz 20-ildir ki, böyüklü-kiçikli məmurlarımız dilindən eşidirik ki, torpaqlarımızı istənilən yolla azad edəcəyik. Biz kəlbəcərlilər də səbrlə torpaqlarımızın azad olduğunu gözləmişik. Ümidlə gözləmişik ki, Azərbaycan dövlətinin apardığı ardıcıl siyasət nəticəsində, ordumuzun döyüş bacarığı ilə Kəlbəcər və digər torpaqlar işğaldan azad ediləcək. Amma bu günə qədər bir qarış torpağımız işğalçılardan azad olmayıb. Biz yalnız hər il torpaqlarımız işğal olunmasının il dönümlərini,anım günlərini qeyd edirik. Bu çox ağır bir haldır. İllər keçdikcə torpaqlarımızın geri qayıtmağına ümidimiz azalır. Biz artıq ümidimizi itiririk. Azərbaycan bölgədə qüdrətli bir dövlət kimi, güclü orduya malik olan bir dövlət kimi torpaqlarını azad etməlidir”.
Daha sonra “Ağsaqqallar cəmiyyətinin” sədri Məhəmməd Quliyev Kəlbəcərin haqsız işğalından danışıb, onun təxribatların qurbanı olduğunu söyləyib. M.Quliyev Kəlbəcərin zəngin yeraltı, yerüstü sərvətlərindən söz açıb.
“Kəlbəcərin azad olunması məsələsi hələ də öz həllini tapmır. Getdikcə bu ərazilərdə Suriyadan, Livandan və digər ölkələrdən köçən erməniləri yerləşdirirlər. BMT və ATƏT prinsiplərinə məhəl qoymurlar”.
O, ermənilərin münaqişənin həllində maraqlı olmadıqlarını bildirib. “Ermənilər bütün dünya ictimaiyətini aldadır və yalan danışmaqda da davam edirlər. Ermənilərə heç bir güzəşt olmayacaq, torpaqlarımız qeyd-şərtsiz azad edilməlidir”,- deyə vurğulayıb.
Tarix elmləri namizədi, şair, publisist Əşrəf Hüseynli çıxışında qeyd edib ki, Kəlbəcər Azərbaycanın ən qədim yaşayış məskənlərindən biridir. Ə.Hüseynli çıxışında tarixi faktlara istina edərək bu ərazilərdə heç vaxt ermənilərin yaşamadığını söyləyib. “Kəlbəcərdə Azərbaycanın tarixi ilə bağlı çox qədim abidələr var, bütövlüklə bu tarixi abidələr qədim yaşayış məskənləri Kəlbəcərin məhz bizə mənsub olduğunu göstərir”.
“Şəhriyar” ədəbi-mədəni cəmiyyətinin sədri Vasif Məmmədov Kəlbəcərin zəngin sərvətindən, füsünkar təbiətindən, mərd insanlarından söz açıb.
“Şəhriyar” ədəbi-mədəni cəmiyyətinin üzvü şair, Abbas Ağdabanlı doğulduğu böyüyüb başa çatdığı Ağdaban kəndinin yandılmasından danışıb. Şair 14 nəfər yaxın qohumunun bir gecədə amansızcasına öldürüldüyünü qeyd edib.
Daha sonra tədbirdə Kəlbəcərin işğalından bəhs edən videoçarxlar nümayiş etdirilib.
Əslən Kəlbəcər rayonundan olan hacı Əbdüləziz Kəlbəcərdə və bütövlüklə Qarabağ uğrunda həlak olan şəhidlərimizin ruhuna dualar oxuyub.
Tədbirin sonunda Kəlbəcər və Qarabağ şəhidlərinin ruhuna ehsan verilib.
Modern.az