“Türkiyə Dağlıq Qarabağ münaqişəsi həllini tapmadan Ermənistanla imzalanmış protokolları ratifikasiya etməyəcək”. Modern.az-ın “Armeniya novosti” agentliyinə istinadən verdiyi məlumata görə, bu barədə Ermənistanın sabiq xarici işlər naziri Aleksandr Arzumanyan bu gün keçirdiyi mətbuat konfransında bildirib. “Türkiyə-Ermənistan münasibətlərinin normallaşması Qarabağ münaqişəsinin nizamlanması və ya Türkiyənin maraqlarına uyğun olaraq nizamlama istiqamətində müəyyən proqresin əldə olunması il sıx bağlıdır”-deyə sabiq XİN başçısı bildirib. Onun sözlərinə görə, Türkiyə əvvəldən protokolları ratifikasiya etməyə hazırlaşmayıb, çünki Sürixdə sənədlərin imzalanmasından sonra Türkiyə rəhbərliyi Türkiyə - Ermənistan prosesini Qarabağ problemi ilə əlaqələndirməyə başladı. Sabiq nazirə görə, Türkiyə sənədləri ratifikasiya etməmək üçün müxtəlif bəhanələr gətirəcək. Türkiyə XİN-in Ermənistan Konstitusiya Məhkəməsinin qərarının protokolların məzmunu ilə uyğun gəlmədiyinə dair verdiyi son bəyanat da bu bəhanələrdən biri olub.
