Bu gün Ermənistan Silahlı Qüvvələri günorta saatlarından başlayaraq Azərbaycan Ordusunun bir neçə istiqamətdə mövqelərini atəşə tutmağa başlayıb. Qoşunların təmas xəttində baş vermiş atışmada Azərbaycan Ordusunun iki əsgəri şəhid olub, iki əsgər yaralanıb. Onların hamısı snayper gülləsinə tuş gəliblər.
Baş verənlərlə bağlı bir daha ATƏT –in fəaliyyətdə olan sədri, Qazaxıstanın xarici işlər naziri Kanat Saudabayev cənablarına bir sual vermək yerinə düşərdi. Saudabayev Qarabağa səfərində təmas xəttində snayperlərin aradan götürlməsini söyləyib. Cənab Saudabayevin xəbəri varmı ki, təmas xəttində snayperlər harada yerləşir və atəşkəsi kim pozur? ATƏT sədrinin əsas missiyası məhz atəşkəsin pozulması riskinin və insan itkilərinin aradan qaldırılması və deməli hərbi əməliyyatların başlanması ehtimalının qarşısının alınmasından ibarət olmalıdır. Bir–birini əvəz edən ATƏT sədrlərinin Qarabağa gedib-gəlib yalançı sülh təklifləri verməsi imitasiyadan başqa bir şey deyil.
