Ozarbayjon va Turkiya Afrika mamlakatlarida uch tomonlama loyihalarni amalga oshirish imkoniyatlarini koʻrib chiqmoqda.
Modern.az xabar berishicha, bu haqda Ozarbayjon tashqi ishlar vaziri Jeyhun Bayramov turkiyalik hamkasbi Hakan Fidan bilan boʻlib oʻtgan qoʻshma matbuot anjumanida maʼlum qildi.
Vazirning taʼkidlashicha, Ozarbayjon soʻnggi yillarda Afrika mamlakatlari bilan munosabatlarni ustuvor yoʻnalishlardan biri sifatida belgilagan.
“Ozarbayjonning Afrika mamlakatlariga savdo-iqtisodiy missiyalari va qitʼada amalga oshirayotgan loyihalari soni ortib bormoqda. Bu yoʻnalishda katta salohiyat mavjud”, – dedi Jeyhun Bayramov.
Tashqi ishlar vaziri Turkiyaning Afrikada eng keng diplomatik va iqtisodiy vakillikka ega davlatlardan biri ekanligini taʼkidladi.
Uning soʻzlariga koʻra, Ozarbayjon va Turkiya ayrim Afrika mamlakatlari ishtirokida uch tomonlama loyihalarni amalga oshirishi mumkin.
Jeyhun Bayramovning taʼkidlashicha, Boku va Anqara oʻrtasidagi diplomatik-siyosiy hamkorlik ikki tomonlama munosabatlar bilan cheklanib qolmay, mintaqaviy davlatlar ishtirokidagi uch tomonlama, shuningdek, toʻrt tomonlama formatlarni ham oʻz ichiga oladi.
