Turkiyada dizel yoqilg‘isi narxi rekord darajaga yaqinlashdi. Kechasi yoqilg‘i quyish shoxobchalarida bir litr dizelga taxminan 6,5 lira qo‘shildi.
Modern.az xorijiy OAVga tayanib xabar berishicha, narx oshganidan so‘ng Istanbulda bir litr dizel narxi 95,5 liraga, Anqarada 96,75 liraga, Izmirda esa 97 liraga yetdi.
Mamlakatning sharqida joylashgan Bitlis, Hakkari va Mush viloyatlarida esa bir litr dizel 98,5 liraga ko‘tarildi. Shunday qilib, dizelning 100 liralik psixologik chegaraga yetishiga atigi 1,5 lira qoldi. Avgust oyida hukumat narxning bu chegaradan oshib ketishining oldini olish uchun maxsus iste’mol solig‘ini (ÖTV) bir oyga nolga tushirgandi. 1-sentabrdan boshlab soliq qayta joriy etildi va har bir litr dizelga 3 lira soliq hisoblanadi.
Ma’lumotlarga ko‘ra, kelgusi oylarda soliqning bosqichma-bosqich oshirilishi kutilmoqda. Oktabrda o‘sish 6 lira, noyabrda 9 lira, dekabrda 12 lira, 2027-yil yanvaridan esa taxminan 14 lira bo‘lishi nazarda tutilgan. Bundan tashqari, “Brent” markali neft narxining 110 dollarga ko‘tarilishi va Eron atrofida neft yetkazib berishda yuzaga kelgan cheklovlar yoqilg‘i narxi bilan bog‘liq optimistik prognozlarga asos bermaydi.
“Sözcü” gazetasi yozishicha, qo‘shimcha ma’muriy choralar ko‘rilmasa, bu kecha dizel narxiga yana 2,5–3 lira qo‘shilishi mumkin. Bu holda Turkiya Respublikasi tarixida birinchi marta bir litr dizel narxi 100 liradan oshib ketishi mumkin.
